ट्रयाक्टरले ठक्कर दिँदा दुई बालक ठहरै !

न्यूज ब्यूरो, रौतहट । रौतहटको कटहरिया नगरपालिका–१ भसेढवास्थित ट्याक्टरको ठक्करबाट २ बालकको मृत्यु भएको छ ।

ना ६ त ३५६७ नम्बरको ट्याक्टरले ठक्कर दिँदा गुुजरा नगरपालिका–६ का रामविलास ठाकुरको छोरा ८ वर्षीय छोटेलाल ठाकुर र सोही ठाँउका पनिलाल ठाकुरको छोरा १२ वर्षीय सन्तोष ठाकुरको मृत्यु भएको प्रहरीले जनाएको छ ।

शुुक्रवार अपरान्ह लालबकैया नदीबाट बालुवा बोकेर तीव्र गतीमा आइरहेको उक्त ट्याक्टरले साइकलमा सवार दुुई बालकलाई पछाडीबाट ठक्कर दिँदा साइकल पछाडी बसेका ८ वर्षीय छोटेलाल ठाकुरको घटनास्थलमै मृत्युु भएको इलाका प्रहरी कार्यालय कटहरियाका प्रहरी नायब निरीक्षक आमोद कुमार यादवले बताए ।

ठक्करबाट गम्भिर घाइते साइकलचालक १२ वर्षीय सन्तोष ठाकुरको वीरगञ्जस्थित हेल्थकेयर अस्पतालमा उपचारको क्रममा शुक्रबार ५ः३० बजे मृत्यु भएको यादवले जानकारी दिए ।

ठक्कर दिएको ट्याक्टर इलाका प्रहरी कार्यालय कटहरियाको नियन्त्रणमा रहेको र हालसम्म पहिचान हुन नसकेका ट्याक्टर चालक भने फरार रहेको प्रहरीले जनाएको छ ।