रौतहटका एक मेयरको यस्तो आरोप

रौतहट, २ फागुन । रौतहटको फतुवा विजयपुर नगरपालिकाका मेयर गोपाल राय यादवले विपक्षीको कारण नगरपालिकाको नगरसभा हुन नसकेको बताएका छन् ।

चालू आर्थिक वर्षको सात महिना बितिसक्दा पनि नगरसभा हुन नसकेकामा दुई तिहाईको संख्यामा रहेको विपक्षी नै प्रमुख कारण रहेको पत्रकार सम्मेलन गरी जनाएका छन् । नगरपालिकामा दुई तिहाईको बहुमतमा रहेको नेकपाले नगरसभा हुन नदिँदा चालू खर्चबाहेक अन्य कुनै पनि शीर्षकको रकम खर्च हुन नसकेको बताएका छन् ।

नगरपालिकाको २१ सदस्यीय कार्यपालिकामध्ये १७ जना नेकपाको रहेका छन् । गत हप्ता ८ वटा वडाध्यक्षसहित उपमेयर कान्तिदेवी महतोले पत्रकार सम्मेलन गरी मेयर यादवले नगरसभा नै बोलाउन नचाहेको र प्रमुख प्रशासकीय अधिकृतसित मिलेर एकलौटी नगरपालिका सञ्चालन गरेको आरोप लगाएकी थिइन् ।

उपमेयरको पत्रकारसम्मेलन विरुद्ध मेयर यादवले पनि तीनवटा वडाध्यक्षसहित पत्रकार सम्मेलन गरी उपमेयर पक्षले लालबकैया नदीको गिटी, बालुवा, ढुंगाको राजस्व असुली गरी केही रकम अहिलेसम्म बैंक दाखिला नगरेको आरोप लगाएका छन् ।

गत पुसको पहिलो हप्तादेखि नगरपालिकाका कर्मचारीले नै गिटी, बालुवा र ढुंगाको राजस्व उठाइरहेको बताउँदै मेयर यादवले अहिलेसम्म बैंक खातामा ३३ लाख रुपैया जम्मा भइसकेको स्पष्ट पारेका छन् । मेयर यादवले उपमेयरको सहमतिमा प्रमुख प्रशासकीय अधिकृत, शाखा अधिकृत र वडाध्यक्षहरुको संयुक्त सहमतिमा कार्यालय अर्को ठाउँमा सारेको बताए पनि कार्यालय स्तरीय वा कार्यपालिकास्तरीय निर्णय भने नभएको स्वीकार गरेका छन् । उपमेयर पक्षले बिना निर्णय कार्यालय सारिएकोमा विरोध गर्दै आएको छ ।

मेयर यादव पक्षाका कर्मचारीहरुको मनोमानी नगरपालिकामा बढेको स्थानीयको आरोप छ । पत्रकार सम्मेलनमै नगरपालिकाका खरिदार बिल्टु राय यादवले भूकम्प आउँदाको अवस्थाको जस्तो मेयर यादवको निर्देशनमा आफूले कार्यालय सारेको स्वीकार गरेका छन् ।

मेयर यादवले नगरका कर्मचारीहरुले आफूले भनेको नमानेको बताएका छन् । पत्रकार सम्मेलनबाटै मेयर यादवले नगरपालिकाका प्रमुख प्रशासकीय अधिकृत सागर रोक्कालाई फोन गरेर बोलाउँदा रोक्काले आफूलाई चाहिँ पत्रकार सम्मेलनको पूर्व जानकारी नभएको भन्दै उपस्थित हुन अस्वीकार गरेका थिए ।