धनुषामा करेन्ट लागेर ६ जनाको मृत्यूको घटना नसेलाउँदै फेरी डिजेमा करेंट लागेर एक जनाको मृत्यु !

जनकपुरधाम, १३ माघ । जन्ती (बाराती) बोकेको बसमा करेन्ट लागेर ६ जनाको मृत्यू भएको घटनाको तीन दिन नबित्दै पुनः त्यही प्रकृतिको घटना दोहरिएको छ ।

धनुषाको सबैला नगरपालिका वडा नं. १३ ढोलबज्जा मुसरिटोलमा आईतबार फेरी पनि एक जनाको करेंट लागेर घटनास्थलमै मृत्यु भएको हो । डिजे बोकेको बेला करेन्ट लागेर मृत्यु भएको स्थानीय प्रत्यक्षदर्शीहरुले जनाएको छ । मृत्यू हुनेमा स्थानीय ६५ वर्षिय कविलास सदा रहेको जनाइएको छ ।

आफ्नै घरमा जन्ती आएको बेला जन्तीले ल्याएको डिजे बाजा बजाइरहेको क्रममा नाङ्गो तार खुट्टामा बेरिएपछि करेन्ट लागेर घटनास्थलमै मृत्यु भएको ईलाका प्रहरी कार्यालय सबैलाले जनाएको छ । मृतकको शवलाई पोष्टमार्टमको लागि जनकपुर अञ्चल अस्पतालमा ल्याइएको हो ।

यसअघि गत ११ गते शुक्रबार साँझ मात्र जन्ती बोकेको बसमा ११ हजार भोल्टको करेन्ट प्रभाहित तारमा बसको छत उपर राखिएको ट्रन्कमा छोएपछि ५ जनाको बसमै जलेर मृत्यू भएको थियो भने एक जनाको उपचारको लागि लैजाँदै गर्दा बाटोमै मृत्यू भएको थियो । त्यस दर्दनाक घटनामा १० जना घाईते समेत भएका छन् ।

केही दिन पूर्व मात्र जनकपुरधाम उपमहानगरपालिका वडा नं. १२ कुवारामपुर स्थित ११ हजार भोल्टमै करेन्ट लागेर मोटरसाईकलमा सवार दुई युवकको घटनास्थलमै मृत्यू भएको थियो भने एक जना गम्भिर घाईते भएका हुन् । विगत केही दिनदेखि करेन्टका घटनामा बृद्धि भएको देखिएको छ ।

सर्वसाधारणहरुको लापरवाही तथा विद्युत प्राधिकरणको लापरवाहीको कारण पनि जनधनको क्षति धनुषामा केही दिनदेखि भईरहेको देखिएको छ ।