धनुषामा छात्राको क्रियाखर्चको लागि आर्थिक सहयोग

न्यूज ब्यूरो, जनकपुरधाम । धनुषामा एक छात्राको असमायिक निधनले पीडित परिवारलाई क्रिया खर्चको लागि आर्थिक सहयोग गरिएको छ ।

धनुषाको धनुषाधाम नगरापालिका वडा नं. ९ धारापानी स्थित उच्च माध्यमिक प्राबधिक तथा व्यवसायिक विद्यालय मुलाबारी भिमान धारापानी कक्षा ६ मा अध्ययनरत छात्रा तनु पुर्बछाने मगरको असायिक निधनपछि विक्षिप्त परिवारलाई राहत स्वरुप १५ हजार २ सय रुपैयाँ सहयोग गरिएको हो ।

विद्यालयका शिक्षक शिक्षिका तथा विद्यार्थीहरुले विद्यालयका प्रधानाध्यापक प्रदिप सिंह मार्फत मृतक छात्राकी वुवा पूर्ण बहादुरलाई राहत स्वरूप रु.१५,२०० नगद प्रदान गरेका हुन् ।

आफ्नो विद्यालयको छात्राको असमायिक निधनभएपछि मर्माहित विद्यालय परिवारले आफ्नो खोजी खर्चबाट एक एक पैसा जम्मा गरी मृतक पुर्वछानेको क्रियाखर्चको लागि सहयोग गरिएको हो ।