जनकपुरमा जनसागरबीच डा. सिके राउतको सम्बोधन 'गूड बाई नेपाल' को नारा !

न्यूज ब्यूरो, जनकपुरधाम । जनकपुरधाममा मोटो जनसागरबीच डा. सिके राउतले आफ्ना कार्यकर्ता तथा समर्थकहरुलाई सम्बोधन गरेका छन् । विगत १५ दिनदेखि सम्पर्क विहिन भएका डा. सिके राउत मधेसी जनतासँग गरेको वाचा र प्रतिवद्धता होसीयारीपूर्वक निभाएका छन् ।

गत २ महिना अघि देखि नै "चलु जनकपुर, भरु जनकपुर" कार्यक्रम अन्तर्गत मधेसी शहिदप्रति सम्मान तथा जारी गरिएको संविधान विभेदकारी रहेको भन्दै संविधान दिवसमा कालो दिवस मनाउने उद्घोष गरे बमोजिम वाचा पूरा गर्न भ्याएका छन् ।

राउतको उक्त कार्यक्रमलाई विफल पार्नको लागि धनुषा प्रहरी लगायत प्रदेश नं. २ का सबै जिल्लाका प्रहरी परिचालन गरी सर्च अपरेशन चलाएको थियो तर राउतले प्रहरीलाई मात दिँदै आखिरसम्म विरोध दिवसमा सहभागी भएर सबैलाई चकित पारे ।

डा. राउतको कार्यक्रमलाई असफल पार्नको लागि धनुषा प्रहरीले होटेल, लजहरुमा निगरानी बढाएको थियो भने उनको जनकपुर स्थितको डेरामा २४ सै घण्टा नजर राखेका थिए ।

डा. राउतले कालो दिवसलाई सम्बोधन गर्दै मधेसी जनताहरुसँग प्रदेश सरकारले समेत धोकेवाजी गरेको आरोप लगाए । उनले भने, "संविधान नमानेको खण्डमा मधेसी जनताहरुबाट उठाइएको कर संविधान जारी गर्ने सरकारलाई बुझाउनु भनेको जनतासँग धोका मात्र हो । "

विरोध दिवसमा राउतको हजारौँ हजार समर्थकले पर्चा, पम्पलेट, बैनर सहित जनकपुरधाममा "चलु जनकपुर, भरु जनकपुर" मा सक्रिय सहभागीता जनाएका थिए ।

उक्त विरोध तथा श्रद्धाञ्जली कार्यक्रममा सहभागी उनका समर्थकहरुले फ्री मधेस र गूड बाई नेपाल को नारा सहित बैनर प्रदर्शन गरेका थिए ।