धनुषा प्रहरीको ठुलो सफलताः १२ दिनदेखि निरन्तर निगरानीमा थिइन सुनिता, प्रहरीको अपरेशनपछि घुँडा टेकिन अपहरणकारी

न्यूज ब्यूरो, जनकपुरधाम । धनुषामा डेढ बर्षिय बालक अपहरणमा परेको १२ दिनपछि धनुषा प्रहरीले अपहरणमुक्त गराउन सफल भएको छ ।

गत भदौ १८ गते दिउँसो करिब ३ः०० बजे आफ्नै घर नजिकबाट उठाईएका धनुषा विदेह नगरपालिका तिनकोरिया बस्ने कमलेश महतोका डेढ बर्षिय छोरा सिदाँश महतोलाई एक महिलाले विभिन्न स्थानमा घुमाएको तथ्य फेला परेको छ । बालक हराएपछि आफैँ धनुषाका एसपी रुपेश खड्का र डिएसपी ओमप्रकाश खनाल फिल्डमा खटेका थिए ।

बालक हराएको सूचना पाए लगत्तै डग टोलीसहित परिचालन गरेको धनुषा प्रहरीले तत्कालै क्लू पाएको थियो । विगत १२ दिनदेखि बच्चा चोरी भएको प्रकरणलाई गोप्य रुपमा पछयाउँदै गएको धनुषा प्रहरीले अन्ततः १२औँ दिनमा सफलता हाँसिल गरेको हो ।

सुरुदिनदेखि नै धनुषा प्रहरीले सबुत प्रमाणहरु जुटाउँदै बच्चा अपहरणमा संलग्न एक महिला उपर निरन्तर निगरानी बढाएको थियो । जनकपुरमा डेरा गरी बस्दै आएकी एक महिलामाथि शंका गएपछि प्रहरीले सोही कोणबाट अनुसन्धान प्रक्रिया अगाडी बढायो ।

धनुषाको कमला नगरपालिका वडा नं. ९ दुबरकोट बस्ने स्थानीय महिला सुनितादेवी पासवानलाई धनुषा प्रहरीले पक्राउ गरेको छ । सुरुदिनदेखि धनुषा प्रहरीले पासवानलाई पछयाउँदै आएकोमा आज सफलता हात पारेको हो ।

जानकारी अनुसार, सुनिताको आफ्नो छोराको मृत्यू भएको शल्यक्रिया समेत गराएको कारण उनको सन्तान नहुने भएपछि उनले बच्चा चोरीको योजना बनाएको बताईएको छ । सुनिताले खेल्दै गरेका सिदाँशलाई घरबाटै उठाएर भारततर्फ लगेको प्रहरीको अनुसन्धानबाट खुलेको छ । प्रारम्भिक जानकारी अनुसार, सुनिताको माईत रहेको भारत बिहारको खौना लखबास्थित बालकलाई राख्दै आएको खुलेको छ ।