बाढीमा सम्पर्कविहिन भएका धनुषाका अजय प्रसाद सिंहका दुवै मोबाइल नम्बर रसुवामा ट्रेस

न्यूज ब्यूरो, जनकपुरधाम । रसुवामा आएको बाढीपहिरोपछि सम्पर्कविहीन भएका इन्जिनियर अजय प्रसाद सिंहका दुईवटा मोबाइल नम्बर रसुवा जिल्लाका विभिन्न स्थानमा ट्रेस भएको पाइएको छ ।

प्राप्त विवरणअनुसार भदौ १० गते दिउँसो १२ः५१ बजे सिंहले प्रयोग गर्दै आएको एनसेलको ९८२३८०३१०० नम्बर उत्तरगया गाउँपालिका, रसुवामा ट्रेस भएको थियो । उक्त समयमा मोबाइलको स्थान २८.०९३६७ अक्षांश र ८५.२११६२ देशान्तरमा देखिएको विवरणमा उल्लेख छ ।

त्यसैगरी सोही दिन साँझ ५ः३० बजे सिंहको नेपाल टेलिकमको ९८४४४०५९९३ नम्बर रसुवाको राम्चे क्षेत्रमा ट्रेस भएको जनाइएको छ ।

सिंहका दुवै मोबाइल नम्बर काठमाडौंमा प्रहरीले निरन्तर ट्रेस गरिरहेको बताइएको छ । उनी सम्पर्कविहीन भएपछि मोबाइलको लोकेसनका आधारमा सम्भावित स्थान पहिचान गरी खोजी कार्यलाई थप प्रभावकारी बनाउनुपर्ने परिवार तथा आफन्तको माग छ ।

सिंहका एनसेल नम्बर ९८२३८०३१०० र नेपाल टेलिकमको ९८४४४०५९९३ नम्बरमा देखिएको पछिल्लो लोकेसनले उनी रसुवाकै क्षेत्रमा रहेको हुनसक्ने आशंका थप बलियो बनाएको छ ।

प्रहरीले मोबाइल लोकेसन तथा अन्य प्राविधिक माध्यमबाट सिंहको खोजीलाई निरन्तरता दिइरहेको बताइएको छ ।