धनुषाका लेखा कर्मचारीहरुको 'लेखा समूह धनुषा' ले बाढीपीडितका लागि पठाए एक लाख रुपैयाँ

न्यूज ब्यूरो, जनकपुरधाम । धनुषामा कार्यरत लेखा अधिकृत, लेखाहरुको समूह “लेखा समूह धनुषा” ले रसुवा बाढी पीडितका लागि एक लाख रुपैयाँ राहत सहयोग पठाएका छन् । 

विहिबार जिल्ला प्रशासन कार्यालय धनुषाका प्रमुख जिल्ला अधिकारी मार्फत सो रकम बाढीपिडितका लागि पठाएका हुन् । विभिन्न स्थानीय तह, विभिन्न सरकारी निकायमा कार्यरत लेखा अधिकृत, लेखापालहरुले सो रकम जम्मा गरी मानवीय संवेदना भन्दै एक लाख रुपैयाँ सहयोग पठाएका हुन् । 

बुधबार बिहान करिब ९ बजे नेपालको रसुवा जिल्लास्थित भोटेकोशीमा आएको महाविनाशकारी बाढीले सयौँ जनाको ज्यान गएको छ भने सयौँ घाईते भएका छन् । सयौँ परिवार विस्थापित भएपछि उनीहरुको सहायताको लागि लेखा समूह धनुषाले एक लाख रुपैयाँ सहयोग गरेको लेखा समूहका उपाध्यक्ष सँजीव कुमार महतोले जानकारी दिए । 

विभिन्न स्थानीय तह तथा सरकारी निकायमा कार्यरत समूहसँग आवद्ध लेखाहरुबाट रकम संकलन गरी सो रकम पठाएको जानकारी दिए । समूहले सो रकम प्रधानमन्त्री दैवी प्रकोप राहत कोषमा रकम जम्मा गरी भौचरको एक कापी सिडिओलाई हस्तान्तरण गरेको हो ।