धनुषामा सेफ्टी ट्यांकीको सेट्रिंग खोल्नेक्रममा निस्सासिएर एकको मृत्यू, दुई घाइते

न्यूज ब्यूरो |

जनकपुरधाम, २२ साउन । धनुषामा सेफ्टी निर्माणाधीन सेफ्टी ट्यांकीको सेट्रिंग खोल्ने क्रममा निस्सासिएर एकजनाको ज्यान गएको छ । अन्य दुईजना घाइते भएका छन् ।

धनुषाको विदेह नगरपालिका ६ तीनकौरिया बस्ने रामशोभित महतोको घरमा मंगलबार विहान सेफ्टी ट्यांकीको सेट्रिंग खोल्ने क्रममा स्थानीय राजमिस्त्री ३० वर्षका दिनेश चौधरीको निस्सासिएर ज्यान गएको प्रहरीले जनाएको छ ।

त्यस्तै स्थानीय शुभनारायण दास र फुलगेन दास निस्सासिएर सिकिस्त भएका छन् । प्रहरीका अनुसार शभनारायणको उपचार जनकपुर अञ्चल अस्पताल र फुलगेनको उपचार धनुषा अस्पतालमा भइरहेको छ ।

उनीहरुको अवस्था सकुशल रहेको जनाएको छ । तीनकौरिया प्रहरीचोकीका अनुसार विहान दिनेश चौधरी सेट्रिंग खोल्न भित्र पस्दा निस्सासिएर सिकिस्त भएपछि उनको उद्धारका लागि शुभनारायण र फुलगेन पालैपालो छिरेका थिए ।

तर, उनीहरु पनि निस्साएिर सिकिस्त भएपछि प्रहरी टोली पुगेर तीनैजनाको उद्धार गरी उपचारको लागि जनकपुर पठाएको थियो । जनकपुर ल्याउँदै गर्दा मिस्त्री दिनेश चौधरीको बाटोमै ज्यान गएको प्रहरीले जनाएको छ ।