रोशनी झा मृत्यू प्रकरणमा ससुरा भन्छन्,-'मलाई ज्यान मार्ने धम्की आयो, कसरी बाँच्नु ?'

न्यूज ब्यूरो, जनकपुरधाम । धनुषाको कटैया–चौरीकी रोशनी झा मृत्यु प्रकरणमा जिल्ला अदालतमा मुद्दा विचाराधीन रहेकै बेला उनका ससुरा रुद्रप्रकाश मिश्रले आफूलाई ज्यानको धम्की आइरहेको बताएका छन्।

बुधबार जनकपुरधाममा पत्रकार सम्मेलन गर्दै मिश्रले रोशनीको मृत्यु घटनापछि आफू र आफ्नो परिवार मानसिक रूपमा विक्षिप्त बनेको बताए। उनले बुहारीको हत्या आरोपमा छोरा प्रशान्त मिश्र पुर्पक्षका लागि थुनामा रहेको उल्लेख गर्दै त्यसयता माइती पक्षबाट पटक–पटक सम्पत्ति मागसहित धम्की आउने गरेको दाबी गरे।

मिश्रले आफू वृद्ध अवस्थामा रहेको र छोरा जेलमा भएकाले दुई नातिको पालनपोषणको जिम्मेवारी आफ्नै काँधमा आएको बताए। “सम्पत्ति बेचबिखनका लागि दबाब र ज्यान मार्ने धम्कीसमेत आउने गरेको छ,” उनले भने, “मेरो ज्यान असुरक्षित भएकाले सम्पूर्ण सम्पत्ति बालबालिकाकै हकभोगमा रहने गरी संरक्षण गरियोस् भन्ने माग छ।”

उनले रोशनी मृत्यु प्रकरणपछि माइती पक्ष र मामाघरतर्फका केही व्यक्तिले सम्पत्तिकै विषयलाई लिएर विभिन्न ‘जालझेल’ गरिरहेको आरोपसमेत लगाए। साथै, आफूमाथि हातपातसमेत भएको दाबी गर्दै सुरक्षा निकाय र सरोकारवाला निकायसँग आफ्नो सुरक्षाको माग गरेका छन्।

रोशनी झाको मृत्यु प्रकरणमा उनका पति प्रशान्त मिश्रविरुद्ध कर्तव्य ज्यान मुद्दा धनुषा जिल्ला अदालतमा विचाराधीन छ।