'जुन दिन जानकी मन्दिरलाई छोईन्छ, यो सरकार तीन टुक्रा हुन्छ' : महन्थ तपेश्वर दास

न्यूज ब्यूरो, जनकपुरधाम । जानकी मन्दिरका बडा महन्थ राम तपेश्वर दास वैष्णवले सरकारले जानकी मन्दिरलाई छुने प्रयास गरे तीन टुक्रा हुने आक्रोस पोखेका छन् ।

जानकी मन्दिर परिसरमा पार्किँग गरि राखिएको एक साधुको सवारीमा धनुषा निर्वाचन क्षेत्र नं. ३ का साँसद मनिष झाले ह्वील लक गर्न लगाएको घटनाप्रति महन्थ दासले झाप्रति आक्रोस पोखे । उनले जानकी मन्दिर छेउछाउमै माछामासु, मदिरा, दारु पसलहरु सँचालन हुँदा आँखा नदेखेको बताए । उनले गाडी मात्रै देखेको बताउँदै वरपरका यस्ता पसलहरुमा ध्यान गएन ? भनेर प्रश्न तेर्साए ।

गत मँगलबार जानकी मन्दिर परिसरमा जानकी मन्दिरका छोटे महन्थ रामरोशन दास वैष्णवको पार्किँग गरी राखिएको गाडीमा साँसद झाले ट्राफिक बोलाएर ह्वील लक गरी ५०० रुपैयाँ जरिवाना समेत तिराएका थिए । सोही सन्दर्भमा बडा महन्थले यस्तो प्रतिक्रिया दिएका हुन् ।

ट्राफिकले गाडीमा ह्विल लक गरे लगत्तै धनुषा निर्वाचन क्षेत्र–३ बाट निर्वाचित रास्ट्रिय स्वतन्त्र पार्टीका सांसद मनिष झाले ह्विल लक गरिएका गाडीको फोटो आफ्नो सामाजिक सञ्जाल फेसबुकमा राख्दै ती गाडीहरूमा लक गलाउन आफूले नै ट्राफिक प्रहरीलाई अनुरोध गरेको जानकारी दिए ।

उनले लेखेका छन्, ‘जानकी मन्दिर विश्वको सम्पदा हो, पार्किङ स्थल हैन् । यस प्राङ्गण भित्र पार्किङ गरेर राखिएको सबै सवारीसाधनमा लक लगाउन ट्राफिक प्रहरीलाई अनुरोध गरेको छु । ताकी आइन्दा यो हेलचेक्राइ न होस । यसमा अनुशासन आवश्यक छ । विश्व सम्पदा सूचिमा सूचिकृत गराउने, जानकी मन्दिरलनई ट्रस्टमा लाने पहल भइरहेको बेलामा यस्तोमा न्यूनतम अनुशासन नभएसम्म हुँदैन् । सबैलाई जनकपुरधाम र धरोहरहरुलाई माया र संरक्षण गर्न अनुरोध छ ।’ उनको उक्त पोस्ट पछि सबैले थाहा पाए सांसद झाकै निर्देशनमा प्रहरीले गाडीमा ह्विल लक गरेका थिए ।

जनकपुरका पत्रकार सुरेन्द्र यादवसँग महन्त रामतपेश्वर दासले अनौपचारिक रुपमा कुराकानी गर्दै भने, ‘सांसद मनिष झाको निर्देशनमा मन्दिर परिसरमा आएर ट्राफिक प्रहरीले रोशनको गाडीमा लक गरेको र जरिवाना गरेको छु । ट्राफिकले पहिला तपाईं गाडी हटाउनका लागि पूर्व जानकारी गराउनुपथ्र्यो । तर, एकाएक आएर गाडी लक गरेछ । जानकी मन्दिरको वरिपरि खुल्लमखुल्ला मदिरा तथा मासुजन्य पदार्थ बिक्रीवितरण भइरहेको छ । त्यसततर्फ सांसद झाको आँखाले देख्दैन । तर, गाडी देखेछ ।’