जनकपुरको “वाटर ल्याण्ड वाटर पार्क” मा नयाँ सेवा सुविधा विस्तार

न्यूज ब्यूरो, जनकपुरधाम । जनकपुर महेन्द्रनगर सडकखण्डमा सँचालनमा रहेको वन्डर वाटर ल्याण्ड पार्कमा नयाँ सेवा विस्तारको गरिएको छ ।

मधेश प्रदेशको जनकपुर क्षेत्रलाई आन्तरिक तथा बाह्य पर्यटकका लागि आकर्षक गन्तव्य बनाउने उद्देश्यसहित धनुषाको क्षीरेश्वरनाथ नपा–२ राजदेवी मन्दिरस्थित सँचालनमा रहेको आधुनिक “वाटर ल्याण्ड वाटर पार्क” मा अब परिवार, बालबालिका, युवा तथा पर्यटकलाई लक्षित गरी सुरक्षित, स्वच्छ र मनोरञ्जनपूर्ण वातावरण प्रदान गर्ने लक्ष्य लिएको बताइएको छ ।

संस्थाका अनुसार पार्कमा सेवा सञ्चालनका क्रममा विभिन्न प्रशासनिक, प्राविधिक तथा व्यवस्थापनसम्बन्धी चुनौती सामना गर्दै पनि सेवा प्रवाहलाई निरन्तर, व्यवस्थित र गुणस्तरीय बनाइएको छ। सेवाग्राहीलाई समस्या नपरोस् भन्ने प्रतिबद्धताअनुसार सेवा सुधारमा निरन्तर प्रयास भइरहेको जनाइएको छ।

यसैबीच, सेवा विस्तारलाई नयाँ चरणमा लैजाँदै बैशाख ७ गतेदेखि थप सुविधाहरू सुरु गरिएको जनाइएको छ। “बगैँचा” अन्तर्गत अत्याधुनिक रेस्टुरेन्ट, मिटिङ हल, विभिन्न कार्यक्रम आयोजना गर्न उपयुक्त ब्यांकेट, बालबालिकाका लागि सुरक्षित खेल क्षेत्र तथा खुला वातावरणमा मनोरञ्जन गर्न मिल्ने ओपन लाउञ्ज सञ्चालनमा ल्याइएको छ। यी सुविधाले पारिवारिक घुमफिर, शैक्षिक भ्रमण तथा सामाजिक–सांस्कृतिक कार्यक्रमलाई अझ सहज र आकर्षक बनाउने विश्वास गरिएको छ।

खानपान सेवातर्फ विविधता र गुणस्तरलाई प्राथमिकतामा राखिएको छ। परम्परागत मिथिला खानाका साथै भारतीय तथा अन्तर्राष्ट्रिय परिकारसमेत उपलब्ध गराइएको छ। हरियाली वातावरणमा भोजनको आनन्द लिन मिल्ने गार्डेन रेस्टुरेन्ट सुविधा पनि थपिएको कम्पनीले जनाएको छ।

त्यसैगरी, पर्यटकका लागि सफा, सुरक्षित र आकर्षक आवास सेवासमेत विस्तार गरिएको छ, जसले आगन्तुकलाई सुलभ स्तरको होटल अनुभव प्रदान गर्ने अपेक्षा गरिएको छ।

आगामी दिनमा थप सेवा विस्तार, गुणस्तर अभिवृद्धि तथा नयाँ आकर्षणहरू थप्दै जानकी फन पार्क एण्ड रिसोर्टलाई मधेश प्रदेशकै प्रमुख तथा विश्वसनीय मनोरञ्जन गन्तव्यको रूपमा स्थापित गर्ने लक्ष्य लिइएको कम्पनीले जनाएको छ। साथै, दैनिक म्युजिकल ब्याण्ड, सांस्कृतिक कार्यक्रम, डिजे र कन्सर्टको आयोजना “बगैँचा” मा गरिने जानकारी दिँदै सञ्चारकर्मीहरूबाट सकारात्मक सहयोगको अपेक्षा गरिएको छ।