ट्रम्पको यस्तो आदेशपछि तेलको मूल्यमा भारी वृद्धि

न्यूज ब्यूरो । डोनाल्ड ट्रम्प ले हर्मुज जलमार्ग बन्द गर्ने आदेश दिएपछि मध्यपूर्व क्षेत्रमा तनाव चुलिएको छ।

ट्रम्पको निर्देशनपछि अमेरिकी सेनाले सोमबारदेखि हर्मुज जलमार्ग मा नाकाबन्दी लागू गरेको जनाएको छ। ट्रम्पले सामाजिक सञ्जाल ट्रुथ सोशलमार्फत जलमार्गमा सबै जहाजको आवागमन नियन्त्रण गरिने घोषणा गरेका हुन्।

अमेरिका र इरान बीच इस्लामाबाद मा भएको उच्चस्तरीय शान्ति वार्ता निष्कर्षविहीन भएपछि यस्तो निर्णय आएको हो।

अमेरिकी केन्द्रीय कमाण्ड (सेन्टकम) का अनुसार इरानी बन्दरगाहसँग सम्बन्धित समुद्री गतिविधिमा लक्षित नाकाबन्दी लागू गरिएको छ। सेन्टकमले इरानी बन्दरगाहतर्फ जाने वा त्यहाँबाट आउने जहाजहरूलाई रोक्ने र जाँच गर्ने जनाएको छ भने अन्य अन्तर्राष्ट्रिय जहाजहरूको आवागमनमा पूर्ण प्रतिबन्ध नरहने स्पष्ट पारेको छ।

सेन्टकमको भनाइ उद्धृत गर्दै अन्तर्राष्ट्रिय सञ्चारमाध्यमहरूले जनाएअनुसार अरबी खाडी र ओमानको खाडी आसपासका इरानी तटीय क्षेत्रमा प्रवेश गर्ने वा निस्कने जहाजहरूमा नाकाबन्दी ‘निष्पक्ष रूपमा’ लागू गरिनेछ।

हर्मुज जलमार्ग विश्व ऊर्जा आपूर्तिको प्रमुख मार्गमध्ये एक हो। यहाँबाट विश्वको करिब २० प्रतिशत तेल तथा ग्यास आपूर्ति हुने भएकाले कुनै पनि अवरोधले विश्व अर्थतन्त्रमा असर पार्ने विश्लेषण गरिएको छ।

यसैबीच, इरानले अमेरिकी कदमप्रति आपत्ति जनाउँदै आफ्नो तटीय क्षेत्रमा कुनै पनि विदेशी सैन्य उपस्थितिलाई ‘उत्तेजक’ भन्दै कडा प्रतिक्रिया दिने चेतावनी दिएको छ।

दुवै देशबीचको वार्ता असफल भएपछि आणविक कार्यक्रमको विषयलाई लिएर आरोप–प्रत्यारोप पनि बढेको छ। ट्रम्पले इरानले आणविक कार्यक्रम त्याग्न अस्वीकार गरेको आरोप लगाएका छन् भने इरानले अमेरिकाले अत्यधिक सर्तहरू अघि सारेकाले सहमति हुन नसकेको जनाएको छ।

यस घटनाक्रमसँगै अन्तर्राष्ट्रिय बजारमा कच्चा तेलको मूल्यमा तीव्र वृद्धि भएको छ। अमेरिकी कच्चा तेलको मूल्य करिब ८ प्रतिशतले बढेर प्रति ब्यारेल १०४।२४ डलर पुगेको छ भने ब्रेन्ट क्रुडको मूल्य करिब ७ प्रतिशतले बढेर १०२।२९ डलर पुगेको अन्तर्राष्ट्रिय बजारले देखाएको छ।