ईप्रका खजुरीको मिलोमत्तोमा अवैद्य दारु भठ्ठी सँचालन, हजारौ लिटर अवैद्य घरेलु मदिरा बजारमा

न्यूज ब्यूरो, जनकपुरधाम । एकातर्फ प्रहरीले अवैद्य मदिरालाई निरुत्साहित गर्न खोज्दै आएको छ भने अर्कातर्फ प्रहरीकै मिलोमत्तोमा अवैद्य दारु भठ्ठी सँचालनमा रहेको पाईएको छ । 

जिल्ला प्रहरी कार्यालय धनुषा मातहतको ईलाका प्रहरी कार्यालय खजुरीको केही दुरीमा रहेको कठालमा ४ ४ वटा अवैद्य दारु भठ्ठीबाट दारु चुहाएर बजारमा अवैद्य घरेलु मदिरा पहुँच हुन्छ । तर, प्रहरी भने अनभिज्ञ छन् । 

विगतमा बन्द गराईका जनकनन्दिनी गाउँपालिका–६ कठालस्थित सँचालनमा रहेको अवैद्य घरेलु मदिरा उत्पादन गर्ने भठ्ठी प्रहरीको संरक्षणमा सँचालनमा रहेको पाईएको छ । गाउँमा खुलेआम रूपमा भठ्ठी सञ्चालन भइरहेका तथ्य सार्वजनिक भएसँगै स्थानीय तहमा चिन्ता र असन्तुष्टि बढ्दै गएपछि प्रहरीको मिलोमत्तो उजागर भएको हो । 

स्थानीय स्रोतका अनुसार गाउँभित्र कम्तीमा चार स्थानमा निरन्तर रूपमा घरेलु मदिरा उत्पादन भइरहेको छ। केही वर्षअघि नियन्त्रणमा आएको यस्तो गतिविधि पुनः सक्रिय हुनुले नियमन संयन्त्रको प्रभावकारितामाथि प्रश्न उठेको छ। स्थानीयले फुलकुमार, महिन्द्र साह, जोगन गुप्ता र संजय साहलगायत व्यक्तिहरू यस कार्यमा संलग्न रहेको दाबी गरेका छन्।

स्थानीय बासिन्दाले प्रहरीको प्रत्यक्ष निगरानीमै यस्तो गतिविधि सञ्चालन भइरहेको आरोप लगाएका छन्। नाम उल्लेख नगर्ने सर्तमा एक स्थानीयले भने, “भठ्ठीहरू खुलेआम चलिरहेका छन्, तर नियन्त्रणको प्रभावकारी पहल देखिएको छैन।, प्रहरी पनि आफ्ना भाग लिन आउँछन् । घुमुवा प्रहरी बढी आउँछन् ।”

यसैबीच, इलाका प्रहरी कार्यालय खजुरीमा सादा पोशाकमा परिचालित प्रहरीको भूमिकाबारे समेत प्रश्न उठेको छ। प्रहरी हवलदार धीरज यादव, जो ‘घुमुवा’ रूपमा खटिएका छन्, उनीमार्फत अवैध मदिरा व्यवसायीसँग आर्थिक लेनदेन भइरहेको आरोप स्थानीयस्तरमा व्यापक रूपमा उठेको छ। यद्यपि, यसबारे आधिकारिक पुष्टि भने हुन सकेको छैन। तर, प्रहरीको नजिकै रहेको अवैद्य भठ्ठीहरु सँचालन रहँदा प्रहरीले थाहा नपाउनु नैतिकता र इमान्दारितामाथि प्रश्न उठेको छ ।

स्थानीय दाबीअनुसार, उक्त लेनदेनको पहुँच प्रहरी नेतृत्वसम्म पुग्ने आशंका समेत व्यक्त गरिएको छ। यद्यपि, यस विषयमा सम्बन्धित निकायले औपचारिक प्रतिक्रिया जनाएको छैन। बोर्डर र ईलाका प्रहरी कार्यालय खजुरीको क्षेत्रमा घुमुवाको रुपमा परिचालित धीरज यादव भने यस्ता कार्यबाट असुली गर्ने प्रहरीको रुपमा चिनिएको छ । 

प्रहरी निरीक्षक बबिन्द्र नेम्बाङको नेतृत्वमा खजुरी क्षेत्रको सुरक्षा व्यवस्थापन हुँदै आएको भए पनि अवैध गतिविधि नियन्त्रणमा अपेक्षित कडाइ नदेखिएको स्थानीयको गुनासो छ। उनी कार्यभार सम्हालेपछि पहिले रोकिएका भठ्ठीहरू पुनः सञ्चालनमा आएको दाबीले प्रहरी नेतृत्वको कार्यसम्पादनमाथि प्रश्नचिन्ह खडा गरेको छ।

सुरक्षा निकायको दायित्वभित्र पर्ने यस्ता अवैध क्रियाकलाप नियन्त्रणमा ढिलासुस्ती वा समन्वयको अभाव देखिनु प्रशासनिक दृष्टिले गम्भीर विषय मानिन्छ। स्थानीय सरोकारवालाले बारम्बार ध्यानाकर्षण गराउँदा पनि ठोस कारबाही नदेखिनुले प्रहरीप्रति विश्वासमा कमी आएको संकेत गर्छ।

गाउँमा अवैध मदिरा उत्पादन बढेसँगै स्वास्थ्य जोखिम, सामाजिक विकृति तथा पारिवारिक असमझदारीका घटना वृद्धि हुनसक्ने भन्दै स्थानीयले चिन्ता व्यक्त गरेका छन्।

यस सन्दर्भमा इन्चार्ज समेत रहेका बबिन्द्र नेम्वाँगले भने अनभिज्ञता प्रकट गरेका थिए । उनले अवैद्य भठ्ठी सँचालन रहेको बारे आफूलाई जानकारी नरहेको प्रतिक्रिया दिएका थिए । सँचारकर्मी र स्थानीयले समेत प्रहरीलाई दारु भठ्ठी सँचालनको सूचना दिएपनि कुनै कारवाही नगर्दा प्रहरीको नैतिकतामाथि प्रश्न उठेको हो । 

अहिले घुमुवा धीरज यादवलाई इन्सपेक्टर नेम्वाँगले विश्वास पात्र बनाएका छन् । न्यूज ब्यूरोको सम्पर्कमा ईन्सपेक्टर नेम्वाँग विदामा रहेको बेला बरिष्ठ सईले दिएको प्रतिक्रिया अनुसार भठ्ठी सँचालनमा रहेको पुष्टि गरेका थिए । उनले सँचालनमा रहेको जानकारीमा आएर कैयौँ पटक चेतावनी दिएको प्रतिक्रिया दिएका थिए । उनले पुनः कारवाही गर्ने बताएका थिए । 

प्रहरी संगठनमा तल्ला दर्जाका कर्मचारीले गलती गरे कार्यालय प्रमुखको हुने नैतिक जिम्मेवारी लिनुपर्ने प्रहरी सँगठनको अनुशासन छ ।