अब धनुषामा पनि अनलाइनबाटै जग्गाको नक्सा, यस्तो अनलाईन विधि

न्यूज ब्यूरो, जनकपुरधाम । नापी विभाग ले “मेरो कित्ता” प्रणालीमार्फत जग्गासम्बन्धी सेवा पूर्ण रूपमा अनलाइनमार्फत उपलब्ध गराउन थालेको केही महिनापछि नापी कार्यालय धनुषाले समेत अनलाईन प्रविधि लागु गरेको छ । यससँगै अब सेवाग्राहीले घरमै बसेर आफ्नो जग्गाको नक्सा प्रिन्ट गर्न सक्ने भएका छन्।

नापी कार्यालयका अनुसार “मेरो कित्ता” डिजिटल प्रणालीमार्फत नक्सा प्रिन्ट, फिल्डबुक तथा प्लट रजिस्टर जस्ता सेवा लिन सकिन्छ। यसले सेवाग्राहीलाई नापी कार्यालयमा धाउनुपर्ने बाध्यता हटाउँदै सेवा प्रक्रियालाई सहज, छिटो र पारदर्शी बनाउने अपेक्षा गरिएको छ।

अनलाइनबाट नक्सा प्रिन्ट गर्न सेवाग्राहीले आफ्नो नागरिकता, जग्गाधनी प्रमाणपुर्जा (लालपुर्जा) तथा सम्बन्धित कित्ता नम्बर, वडा नम्बर र नक्सा नम्बर जस्ता विवरण पेश गर्नुपर्ने हुन्छ। निवेदन दर्ता गर्दा मोबाइल नम्बरमार्फत इत्ए प्रमाणीकरण गर्नुपर्ने व्यवस्था गरिएको छ।

निवेदन पेश भएपछि सम्बन्धित नापी कार्यालयले विवरण प्रमाणीकरण गर्छ। त्यसपछि तिर्नुपर्ने राजश्वबारे सेवाग्राहीलाई एसएमएसमार्फत जानकारी दिइन्छ। राजश्व अनलाइन वा बैंकमार्फत भुक्तानी गर्न सकिन्छ।

भुक्तानी पुष्टि भएपछि नापी कार्यालयले डिजिटल नक्सा ९एम्ँ० उपलब्ध गराउँछ। सेवाग्राहीले इत्ए प्रयोग गरी उक्त नक्सा डाउनलोड गर्न सक्छन्, जुन लिंक ७ दिनसम्म मात्र मान्य रहने विभागले जनाएको छ।

सरकारले जग्गा प्रशासनलाई डिजिटल माध्यममा रूपान्तरण गर्ने उद्देश्यले सुरु गरेको यो प्रणालीले सेवा प्रवाहलाई प्रभावकारी बनाउने विश्वास लिइएको छ। साथै, यसले सेवाग्राहीको समय र खर्च दुवै बचत गर्ने अपेक्षा गरिएको छ।
साधारण तरिकाले बुझ्ने विधिः

नक्सा प्रिन्ट गर्न आवश्यक कागजात

अनलाइन आवेदनका लागि निम्न कागजात आवश्यक पर्छः

• जग्गाधनीको नागरिकताको स्क्यान कपी

• जग्गाधनी प्रमाणपुर्जा (लालपुर्जा)

• जग्गाको विवरण (वडा नं., नक्सा नं., कित्ता नं.)

• मोबाइल नम्बर (OTP प्रमाणीकरणका लागि)

अनलाइनबाट नक्सा प्रिन्ट गर्ने प्रक्रिया

नक्सा प्रिन्ट गर्न निम्न चरण पालना गर्नुपर्छः

१. अनलाइन निवेदन

मेरो कित्ता प्रणालीमा गई आवश्यक विवरण भरेर अनलाइन निवेदन पेश गर्नुपर्छ।

२. OTP प्रमाणीकरण

निवेदन पेश गरेपछि प्रयोगकर्ताको मोबाइलमा OTP कोड आउँछ, जुन सेवा प्रक्रियाभर आवश्यक हुन्छ।

३. विवरण जाँच

सम्बन्धित नापी कार्यालयले निवेदनको विवरण जाँच गर्छ।

४. राजश्व भुक्तानी

जाँचपछि तिर्नुपर्ने शुल्क SMS मार्फत जानकारी दिइन्छ।

• अनलाइन माध्यमबाट भुक्तानी गर्न सकिन्छ

• वा भौचर प्रिन्ट गरेर बैंकमार्फत तिर्न सकिन्छ

५. डिजिटल नक्सा प्राप्ति

भुक्तानीपछि कार्यालयले नक्साको PDF कपी अपलोड गर्छ र SMS पठाइन्छ।

६. डाउनलोड र प्रिन्ट

मोबाइल नम्बर र OTP प्रयोग गरी नक्सा डाउनलोड गर्न सकिन्छ।

• डाउनलोड लिंक ७ दिनसम्म मात्र मान्य हुन्छ

• त्यसपछि प्रिन्ट गर्न सकिन्छ