जनकपुरमा मोबाईल पसलेमाथि अन्धाधुन खुकुरी प्रहार, एकको अवस्था गम्भिर

न्यूज ब्यूरो, जनकपुरधाम । जनकपुरधाममा सामान्य मोबाइल किनबेचको विवादले अचानक भयावह रूप लिएको छ। एक व्यक्तिले मोबाइल पसलका कामदारमाथि खुकुरी प्रहार गर्दा गम्भीर अवस्था सिर्जना भएको छ।

शुक्रबार जनकपुरधाम उपमहानगरपालिका वडा नं. २ अगाडि रहेको “मोबाइल मल” पसलमा यो घटना भएको हो। मोबाइल खरिदकर्ता निर्भय मिश्राले पसलका कामदार नवीन कुसियैतमाथि खुकुरी प्रहार गरी गम्भीर घाइते बनाएका छन्।

धनुषा प्रहरीका प्रवक्ता गणेशबहादुर बमका अनुसार मोबाइल किन्ने विषयमा दुवै पक्षबीच विवाद चर्किएको थियो। सोही क्रममा मिश्राले कुसियैतमाथि चारदेखि पाँच पटकसम्म खुकुरी प्रहार गरेका थिए।

घटनापछि घाइते कुसियैतलाई तत्कालै प्रादेशिक अस्पताल जनकपुरधाममा भर्ना गरिएको छ, जहाँ उनको उपचार भइरहेको छ।

उता, आक्रमणकारी मिश्रालाई भने घटनास्थलबाटै प्रहरीले नियन्त्रणमा लिएर अनुसन्धान सुरु गरिसकेको छ।

पसल सञ्चालक सदाम राइनका अनुसार मिश्राले करिब ६ महिना अघि ईएमआईमा “S25” मोबाइल खरिद गरेका थिए। तीन महिनादेखि किस्ता नतिरेपछि पसलका कामदारले ताकेता गर्दा विवाद सुरु भएको थियो। सोही पुरानो रिसिइबी आज ठूलो घटनामा परिणत भएको बताइएको छ।

जनकपुरमा भएको यो घटनाले सानो विवाद कसरी ठूलो हिंसामा बदलिन सक्छ भन्ने गम्भीर संकेत दिएको छ। प्रहरीले घटनाबारे थप अनुसन्धान जारी राखेको छ।