चैती छठ पर्व विधिवत् सुरु, आज खरना

न्यूज ब्यूरो, जनकपुरधाम । तराई–मधेश–मिथिला क्षेत्रमा चारदिने चैती छठ पर्व आइतबारदेखि विधिवत् सुरु भएको छ। पर्सा, बारा, रौतहट, सर्लाही, महोत्तरी, धनुषा, सिरहा, सप्तरी, सुनसरी र मोरङलगायत क्षेत्रमा श्रद्धापूर्वक पर्व मनाइँदैछ।

विशेषगरी जनकपुरधाम सहितका विभिन्न पोखरी, तलाउ र नदी किनारमा भक्तजनको घुइँचो लागेको छ। सूर्य उपासनामा आधारित यस पर्वमा अस्ताउँदो र उदाउँदो सूर्यलाई अर्घ दिने परम्परा रहेको छ।

पहिलो दिन ‘नहाय–खाय’, दोस्रो दिन ‘खरना’, तेस्रो दिन साँझ अस्ताउँदो सूर्यलाई अर्घ र अन्तिम दिन बिहान उदाउँदो सूर्यलाई अर्घ दिई पर्व सम्पन्न गरिन्छ।

पारिवारिक सुख, शान्ति र समृद्धिको कामनासहित मनाइने छठ धार्मिक मात्र नभई सामाजिक सद्भावको प्रतीकका रूपमा पनि परिचित छ।