पानीको अधिकतम खुद्रा मूल्य निर्धारण, काठमान्डौँमा १६ ,बाहिर बढीमा २० लिन पाउने

काठमाडौं । बजारमा बोतल तथा जारमा बिक्री–वितरण हुँदै आएको प्रशोधित खानेपानीको अधिकतम खुद्रा मूल्य (MRP) निर्धारण गरिएको छ। वाणिज्य, आपूर्ति तथा उपभोक्ता संरक्षण विभागले सूचना जारी गर्दै काठमाडौं उपत्यका भित्र र बाहिरका लागि फरक–फरक अधिकतम मूल्य तोकेको जनाएको छ।

विभागका अनुसार संघीय संसद अन्तर्गतको उद्योग, वाणिज्य र श्रम तथा उपभोक्ता हित समितिबाट गठित बजार अनुगमन उपसमितिको अध्ययन प्रतिवेदनका आधारमा प्रशोधित पानीको अधिकतम खुद्रा मूल्य निर्धारण गरिएको हो। विभागले उक्त मूल्य कार्यान्वयनमा ल्याइएको जानकारी दिँदै आम उपभोक्ता, उत्पादक तथा विक्रेतालाई सोही अनुसार कारोबार गर्न आग्रह गरेको छ।

निर्धारित मूल्यअनुसार काठमाडौं उपत्यका भित्र १ लिटरको बोतल पानीको अधिकतम खुद्रा मूल्य १६ रुपैयाँ तोकिएको छ भने २० लिटरको जार पानीको अधिकतम मूल्य ४७ रुपैयाँ कायम गरिएको छ।

त्यस्तै काठमाडौं उपत्यका बाहिर १ लिटरको बोतल पानीको अधिकतम खुद्रा मूल्य २० रुपैयाँ तोकिएको छ भने २० लिटरको जार पानीको अधिकतम मूल्य ६० रुपैयाँ निर्धारण गरिएको विभागले जनाएको छ।

विभागका अनुसार तोकिएको मूल्यभन्दा बढी रकम लिएर प्रशोधित पानी बिक्री–वितरण गरेको पाइएमा उपभोक्ता हित संरक्षण ऐन २०७५ तथा नियमावली २०७६ अनुसार सम्बन्धित विक्रेता तथा व्यवसायीमाथि कारबाही गरिनेछ।

साथै विभागले उपभोक्तालाई तोकिएको भन्दा बढी मूल्य तिरेर पानी खरिद नगर्न र यदि कसैले बढी रकम लिएको पाइएमा वाणिज्य, आपूर्ति तथा उपभोक्ता संरक्षण विभाग, मातहतका कार्यालय, सम्बन्धित जिल्ला प्रशासन कार्यालय वा स्थानीय तहमा सूचना दिन आग्रह गरेको छ।

उपभोक्ताको अधिकार संरक्षणमा सहयोग गर्न सबैलाई सचेत र जिम्मेवार हुन विभागले अनुरोध गरेको छ।