धनुषा–२: जनमतका उम्मेदवार डा. सुरेन्द्र यादवको घरमा आगजनीको प्रयास, कून्यू जल्यो

न्यूज ब्यूरो, जनकपुरधाम । धनुषा निर्वाचन क्षेत्र नम्बर २ का उम्मेदवार डाक्टर सुरेन्द्र प्रसाद यादवको घर नजिक राति आगो लगाउने प्रयास भएको छ। घटनामा घरमा रहेका परालको कुन्यू (टाल) मा आगो लाग्ने अवस्था सिर्जना भएको थियो, तर समयमै नियन्त्रणमा लिइएको जानकारी प्राप्त भएको छ।

जनमत पार्टीका कार्यकर्ताहरूले यस घटनालाई “घोर निन्दनीय” भन्दै राजनीतिक प्रतिस्पर्धामा हिंसा प्रयोग गर्नु स्वीकार्य नभएको बताएका छन्। उनका अनुसार, वैचारिक प्रतिस्पर्धामा आउन नसकी रिसवी साध्न घर जलाउने जस्ता षड्यन्त्र गर्ने गतिविधि राजनीतिक अभ्यासको हिस्सा नभएको स्पष्ट पारेका छन् ।

यस घटनाप्रति उनका शुभचिन्तकहरुले प्रतिक्रियामा भनेका छन्,–“यस्तो हिंसात्मक र आतंकपूर्ण प्रवृत्तिले मात्र चुनावी प्रतिस्पर्धालाई बिगार्छ र राजनीतिक संस्कारमाथि प्रश्न उठाउँछ ।”

सुरक्षा निकायले घटनाबारे अनुसन्धान सुरु गरेको छ र दोषीलाई कानुनी कारबाहीको दायरामा ल्याउने प्रतिबद्धता व्यक्त गरेको छ। स्थानीय समुदाय र राजनीतिक वृत्तले पनि यस्ता कार्य विरुद्ध कडा कदम चाल्न आग्रह गरेका छन्।