रास्वपालाई अर्को झट्काः बागमति प्रदेशकी सँस्थापक सदस्य उर्मिलाले पनि त्यागिन रास्वपा

न्यूज ब्यूरो, काठमान्डौँ । राष्ट्रिय स्वतन्त्र पार्टी (रास्वपा) की बागमति प्रदेशकी सँस्थापक सदस्य खेम कुमारी भुर्तेल (उर्मिला) ले पदबाट साधारण सदस्यसमेत नरहने गरी राजीनामा दिएकी छन्।

बुधबार केन्द्रीय कार्यालयलाई सम्बोधन गर्दै उनले पार्टीको स्थापनाकालीन मूल्य, सिद्धान्त र व्यवहारबीच गम्भीर असन्तुलन देखिएको उल्लेख गर्दै राजीनामा घोषणा गरेकी हुन्।

२०७९ सालको प्रतिनिधिसभा निर्वाचनमा प्रत्यक्षतर्फ महिला उम्मेदवार बनेकी भुर्तेलले आफू पार्टीको संस्थापक सदस्यसमेत रहेको उल्लेख गर्दै सुरुवाती चरणदेखि नै योग्यता, क्षमता र समय समर्पित गरी निस्वार्थ रूपमा योगदान पुर्‍याएको दाबी गरेकी छन्।

राजीनामा पत्रमा उनले “राजनीतिमा युवा पुस्ता आउनुपर्छ” र “जान्नेलाई छान्ने” भन्ने मूल नाराबाट प्रेरित भएर पार्टीमा आवद्ध भएको जनाउँदै पछिल्लो समय पार्टी चाप्लुसीवाद र आर्थिक प्रभावमा केन्द्रित हुँदै गएको आरोप लगाएकी छन्। सक्षम महिला तथा युवालाई व्यवहारमा अवसर नदिई नारामै सीमित गरिएको उनको भनाइ छ।

उनले पार्टीभित्र जिम्मेवारी बाँडफाँटमा बेवास्ता गरिएको, भ्रष्टाचार बढेको तथा आगामी फागुन २१ गतेको निर्वाचनसम्बन्धी पार्टीले अवलम्बन गरेको प्रक्रिया र निर्णयहरू पार्टी विधान तथा सार्वजनिक प्रतिबद्धताविपरीत रहेको अनुभव गरेको उल्लेख गरेकी छन्।

भुर्तेलले संगठन निर्माणमा सक्रिय कार्यकर्ताहरूको योगदानको उचित मूल्यांकन नभएको, विधि र विधानविपरीत गतिविधि बढेको तथा आर्थिक अनियमितताबाट पार्टीका निर्णयहरू प्रभावित भएको आरोपसमेत लगाएकी छन्। यस्ता गतिविधिले आफ्नो आत्मसम्मान र राजनीतिक मूल्यमा असर परेको भन्दै उनले पार्टीभित्र बसेर नागरिकप्रति जवाफदेही हुन नसक्ने निष्कर्षमा पुगेको बताएकी छन्।

“यी सबै क्रियाकलापको साक्षी बनेर अब मौन रहिरहन असमर्थ भएकाले आजकै मितिबाट लागू हुने गरी पार्टीको साधारण सदस्यसमेत नरहने गरी राजीनामा दिएको हुँ,” उनले पत्रमा उल्लेख गरेकी छन्।

राजीनामाको अन्त्यमा उनले पार्टीले दिएको अवसर र चुनौतीप्रति आभार व्यक्त गरेकी छन्।

रास्वपाबाट पछिल्लो समय संगठनात्मक निर्णय र आन्तरिक व्यवस्थापनलाई लिएर असन्तुष्टि सार्वजनिक हुने क्रम बढिरहेका बेला भुर्तेलको राजीनामालाई राजनीतिक वृत्तमा अर्थपूर्ण रूपमा हेरिएको छ।