जनकपुरधाममा ‘जनकपुरधाम साहित्य, कला तथा अन्तर्राष्ट्रिय नाट्य महोत्सव २०८२’ को तयारी पूरा

न्यूज ब्यूरो, जनकपुरधाम । यही फागुन ५ गतेदेखि जनकपुरधाममा सुरु हुने ‘जनकपुरधाम साहित्य, कला तथा अन्तर्राष्ट्रिय नाट्य महोत्सव २०८२’ को सम्पूर्ण तयारी पूरा भएको आयोजकले जनाएको छ।

मैथिली विकास कोषको आयोजना तथा मधेश प्रदेश सरकारको शिक्षा तथा संस्कृति मन्त्रालय, जनकपुरधाम उपमहानगरपालिका र राजर्षि जनक विश्वविद्यालयसहित विभिन्न निकायको सह–आयोजनामा हुन लागेको महोत्सवको तयारी अन्तिम चरणमा पुगेको जानकारी कोषले शुक्रबार जनकपुरधाममा आयोजित पत्रकार सम्मेलनमार्फत दिएको हो।

चार दिनसम्म सञ्चालन हुने अन्तर्राष्ट्रिय नाट्य महोत्सवमा नेपाल र भारतका मैथिली भाषा, साहित्य, संस्कृति तथा आर्थिक–सामाजिक क्षेत्रमा योगदान दिएका विद्वान, साहित्यकार र कलाकारहरूको सहभागिता रहने कोषका अध्यक्ष जीवनाथ चौधरीले जानकारी दिए। उनका अनुसार महोत्सव फागुन ५ देखि ८ गतेसम्म सञ्चालन हुनेछ।

यसअघि चार पटक अन्तर्राष्ट्रिय महोत्सव सफलतापूर्वक आयोजना गरिसकेको कोषले यस वर्ष २० विभिन्न विषयमा विमर्श कार्यक्रम आयोजना गर्ने तयारी गरेको छ। साहित्यिक विषयसँगै राजनीतिक, सामाजिक र ऐतिहासिक विषयमा समेत छलफल गरिने पत्रकार सम्मेलनमा जनाइएको छ।

महोत्सवअन्तर्गत चित्रकला तथा पुस्तक प्रदर्शनी, मिथिला भोजन, विविध सांस्कृतिक प्रस्तुति लगायत कार्यक्रम समावेश छन्। सांस्कृतिक झाँकीसहितको शोभायात्रा, विद्यालयस्तरीय वक्तृत्वकला प्रतियोगिता, कविता वाचन, लोकनृत्य प्रतियोगिता, मिथिला चित्रकलाको कार्यशाला तथा प्रदर्शनी, पाँच वटा नाटक मञ्चन र कवि गोष्ठी महोत्सवका मुख्य आकर्षण रहने आयोजकले जनाएको छ।

करिब ५२ लाख रुपैयाँ लागत अनुमान गरिएको महोत्सव जनकपुरधाम–८ स्थित सीता कुण्डमा निर्मित मैथिली विकास कोषको भवन परिसरमा आयोजना हुनेछ। झाँकीसहितको शोभायात्रा भने बाह्र विघा रंगभूमि मैदानबाट सुरु हुने बताइएको छ। अन्य सबै कार्यक्रम कोषको भवन तथा परिसरमा निर्माण गरिने पण्डालमा सञ्चालन हुने आयोजकले जानकारी दिएको छ।