धनुषा–२ मा एमाले उम्मेदवार उमाशंकर अरगरियाको घरदैलो अभियान तीव्र

न्यूज ब्यूरो, जनकपुरधाम । धनुषा निर्वाचन क्षेत्र नम्बर–२ बाट नेकपा एमालेका प्रतिनिधिसभा सदस्य उम्मेदवार उमाशंकर अरगरियाले चुनावी प्रचार अभियानलाई थप तीव्र बनाउँदै घरदैलो कार्यक्रमलाई निरन्तरता दिएका छन् ।

उम्मेदवार अरगरियाले आज औरही गाउँपालिका वडा नं. २ देउरी परवाहा र भराक गाउँमा पुगेर स्थानीय जनतासँग प्रत्यक्ष भेटघाट तथा संवाद गरेका हुन् । घरदैलोका क्रममा उनले जनताको समस्या, आवश्यकता र अपेक्षाबारे जानकारी लिँदै एमालेले अघि सारेका विकास र समृद्धिका योजनाबारे जानकारी गराएका थिए ।

स्थानीयवासीहरूले उम्मेदवार अरगरियाप्रति सकारात्मक प्रतिक्रिया जनाउँदै विकास, रोजगारी, कृषि तथा क्षेत्रको समग्र उन्नतिका लागि सक्षम नेतृत्व आवश्यक रहेको बताएका छन् ।

अरगरियाले जनताको साथ र विश्वासले आफूलाई थप उत्साहित बनाएको उल्लेख गर्दै आगामी दिनहरूमा पनि घरदैलो तथा जनसम्पर्क कार्यक्रमलाई निरन्तरता दिइने बताए ।

एमालेले धनुषा निर्वाचन क्षेत्र नं। २ मा संगठन विस्तारसँगै चुनावी माहोल दिनप्रतिदिन मजबुत बन्दै गएको जनाएको छ ।