नेपाल किसान महासंघको केन्द्रीय सदस्यमा संजय कुमार प्रसाद मनोनयन

न्यूज ब्यूरो, जनकपुरधाम । नेपाल किसान महासंघले धनुषाका संजय कुमार प्रसादलाई केन्द्रीय सदस्य पदमा मनोनयन गरेको छ। महासंघको केन्द्रीय कार्यालय, बी.पी. नगर, सानेपा, ललितपुरबाट जारी पत्रमार्फत उनलाई केन्द्रीय सदस्यमा मनोनयन गरिएको हो।

महासंघका अनुसार नेपाल किसान महासंघको विधान २००८ (संशोधन सहित) बमोजिम प्रसादलाई केन्द्रीय सदस्य पदमा मनोनयन गरिएको हो। महासंघले उनलाई संगठनलाई थप सुदृढ र गतिशील बनाउन महत्वपूर्ण योगदान पुर्‍याउने अपेक्षा समेत व्यक्त गरेको छ।

पत्रमा महासंघले प्रसादको सक्रिय सहभागिता, सहयोग र प्रतिबद्धताले किसान आन्दोलन तथा संगठनलाई मजबुत बनाउने विश्वास लिएको उल्लेख छ। महासंघको नेतृत्वले किसानको हक–हित, अधिकार र समस्याको समाधानका लागि केन्द्रीय तहमा प्रभावकारी भूमिका निर्वाह गर्न उनी सक्षम रहने जनाएको छ।

नेपाल किसान महासंघका अध्यक्ष गणेशचन्द्र तिमिल्सिनाद्वारा हस्ताक्षरित उक्त पत्र २०८२ साल माघ २५ गते जारी गरिएको हो।

प्रसादको मनोनयनसँगै धनुषा जिल्लाबाट किसान आन्दोलनको प्रतिनिधित्व केन्द्रीय तहमा थप सशक्त हुने अपेक्षा गरिएको छ।