एमाले सिरहाका एक दर्जन नेताद्वारा पार्टी परित्याग, सिँह भन्छन-'फोहोर, कसिँगर बढारियो'

न्यूज ब्यूरो, सिरहा । नेकपा एमाले सिरहाका प्रदेश तथा जिल्लास्तरका एक दर्जन नेताले पार्टी परित्यागको घोषणा गरेका छन्। नेतृत्वको कार्यशैलीप्रति असन्तुष्टि जनाउँदै उनीहरूले बुधबार सामूहिक प्रेस विज्ञप्ति जारी गरी पार्टी छाड्ने निर्णय सार्वजनिक गरेका हुन्।

बुधाबर एक प्रेस विज्ञप्ति जारी गर्दै पार्टीभित्र लामो समयदेखि देखिँदै आएको नेतृत्वको स्वेच्छाचारी व्यवहार, एकल निर्णय प्रक्रिया र कार्यकर्ताका भावना तथा आवाजलाई बेवास्ता गर्ने प्रवृत्तिका कारण बाध्य भएर पार्टी परित्याग गर्नुपरेको उल्लेख गरिएको छ। लोकतान्त्रिक अभ्यास कमजोर बन्दै गएको र संगठनभित्र असहमतिको सम्मान नहुने अवस्थाले निरन्तर निराश बनाएको उनीहरूको भनाइ छ।

पार्टी परित्याग गर्नेहरूमा प्रदेश कमिटी सदस्य पुष्पलाल पाख्रिन, पूर्व जिल्ला सदस्य धाबबहादुर बुढाथोकी, शिक्षक संगठनका प्रदेश सदस्य भीमबहादुर थापा, पूर्व जिल्ला कमिटी सदस्य धनराज यादव, तुलसीप्रसाद उपाध्याय, तेजकुमार लामा, जिल्ला कमिटी सदस्य प्रमोदकुमार लामा, गोलबजार नगर कमिटीका पूर्व वडा अध्यक्ष राजकरण साह, नगर कमिटी सदस्यहरू रञ्जितकुमार लामा, ताराबहादुर लामा, किरण स्याङ्वा र राजकुमार महतो रहेका छन्।

यता, एमाले मधेश प्रदेश विद्यार्थी संगठनका संयोजक सतिश सिंहले पार्टी परित्याग गर्नेहरू अवसरवादी भएको आरोप लगाएका छन्। उनले ती नेताहरू पार्टीभित्र रहँदै अघिदेखि नै पार्टीविपरीत गतिविधिमा संलग्न रहेको र गोप्य सूचना बाहिर पुर्‍याउने काम गर्दै आएको दाबी गरे।

‘संगठनभित्र बसेर संगठनलाई कमजोर बनाउनेहरू बाहिरिनु नै राम्रो हो,’ सिंहले भने, ‘अब पार्टीभित्र को कति स्पष्ट छ भन्ने प्रस्ट भएको छ।’

प्रदेश वा जिल्ला कमिटीमा नपरेको निहुँमा पार्टी छाड्नु अवसरवाद भएको उनको टिप्पणी छ। ‘यस्ता मानिसलाई बोकेर हिँड्नुभन्दा छुट्टिनु नै ठीक हो,’ उनले भने, ‘अब पार्टी हलुका मात्र होइन, अझ मजबुत भएर अघि बढ्छ।’