कोरोना कालमा सँजीवनी बनेका 'राजीव झा', अब जनताको मतबाट परिवर्तनको यात्रामा

न्यूज ब्यूरो, जनकपुरधाम । कोरोना महामारीले सम्पूर्ण देश आक्रान्त बनेको बेला, जब अस्पतालहरूमा अक्सिजन अभावले बिरामीहरूको सास रोकिन थालेको थियो, त्यही कठिन घडीमा जनकपुरधाममा सँजीवनी बुटी झैँ बनेर उभिएको थियो — क्लोथ बैँक जनकपुर र त्यस अभियानको अगुवाइ गरेका थिए, राजीव झा।

आज उनी फेरि एकपटक जनताको माझ आएका छन्। २०८२ फागुन २१ गते हुने निर्वाचनमा राष्ट्रिय मुक्ति पार्टी नेपालबाट ‘जातो (चकिया)’ छाप लिएर उम्मेदवारी दर्ता गराएका राजीव झा, कोरोना संकटमा देखाएको निःस्वार्थ सेवा र नेतृत्वका कारण जनकपुरवासीबीच परिचित नाम हुन्।

कोभिड–१९ को चरम अवस्थामा, जनकपुर र आसपासका क्षेत्रमा अक्सिजनको चरम अभाव हुँदा क्लोथ बैँक जनकपुरले पहिलो संस्थाको रूपमा २४ सै घण्टा अक्सिजन सेवा सञ्चालन गर्‍यो। विभिन्न स्थानका दाताहरूबाट अक्सिजन सिलिण्डर संकलन गरी, आवश्यकता परेका व्यक्तिलाई रातको २–३ बजे पनि फोन उठाएर सिलिण्डर उपलब्ध गराइन्थ्यो।

त्यस समय क्लोथ बैँकका संस्थापक अध्यक्ष राजीव झाले भनेका थिए–“राती अक्सिजनको आवश्यकता झनै बढ्छ। फोन आयो भने सुताइको मतलब हुँदैन, उठेर सेवा गर्नुपर्छ।”

उनकै नेतृत्वमा दर्जनौँ भन्दा बढी कोरोना संक्रमितहरूको ज्यान जोगिएको तथ्य जनकपुरबासी अझै सम्झन्छन्।

राजीव झाको समाजसेवा कोरोना कालमै सीमित छैन। प्राकृतिक प्रकोप, बाढी, चिसो, गरिबी, हरेक संकटमा क्लोथ बैँक जनकपुर गाउँ–गाउँ पुगेर कपडा, खाद्यान्न र राहत वितरण गर्दै आएको छ।

जतिसुकै बेला फोन गरे पनि आवश्यक परेका व्यक्तिलाई अक्सिजन वा सहयोग उपलब्ध गराउँदै आएका राजीव झाले अहिले पनि उही सेवामा निरन्तर छन् ।

सेवाबाट राजनीतितर्फ

लामो समयदेखि समाजसेवामा सक्रिय राजीव झा अब भन्छन्,–“सेवाको अनुभवलाई नीति र नेतृत्वमा रूपान्तरण गर्न चुनावमा आएको हुँ।”

निःस्वार्थ सेवा, संकटमा देखाएको नेतृत्व क्षमता र जनतासँगको प्रत्यक्ष सम्बन्धका कारण, उनलाई जनताको उम्मेदवार भनेर चिनिन थालिएको छ।

कोरोनाको अन्धकारमा उज्यालो बनेका राजीव झा आज पनि भन्छन्, “क्लोथ बैँक नागरिक सेवाका लागि सधैं तत्पर छ, र म पनि जनताको सेवाबाट कहिल्यै पछि हट्दिन।”

सेवाबाट सुरु भएको यात्रालाई अब नीति र नेतृत्वमा पुर्‍याउने प्रतिबद्धतासहित, राजीव झा राष्ट्रिय मुक्ति पार्टी नेपालबाट ‘जातो (चकिया)’ छापमा जनताको मत मागिरहेका छन्।