जाडो र शितलहरमा गँगोत्री स्कूल महेन्द्रनगरको न्यानो, २८० बढी बालबालिकालाई जुत्ता मोजा प्रदान

न्यूज ब्यूरो, जनकपुरधाम । धनुषको क्षीरेश्वरनाथ नगरपालिका वडा नं. ५ महेन्द्रनगरस्थित रहेको गँगोत्री स्कूलले दुई समुदायिक विद्यालयका बालबालिकाहरुलाई न्यानो प्रदान गरेको छ ।

गँगोत्री स्कूलले शिलतहर र अत्यधिक जाडो बढेपछि धनुषाको बटेश्वर गाउँपालिका वडा नं. २ भुईचक्रपुरस्थित रहेको जनप्रिय माध्यमिक विद्यालयका बालबालिकाहरुलाई न्यानो कपडा वितरण गरेको हो ।

गँगोत्री स्कूलका सँस्थापक एवम् प्रिन्सिपल समेत रहेका गणेश साहले शुक्रबार विद्यालयमा पुगेर कक्षा १ देखि ७ सम्मको बालबालिकाहरुलाई तथा राष्ट्रिय आधारभूत विद्यालय सीतापुरका कक्षा १ देखि ५ सम्मको बालबालिकाहरुलाई जुत्ता, मोजा वितरण गरेको हो ।

सँस्थापक साहद्वारा चिसो मौसमलाई मध्यनजर गर्दै शीतलहरको यस कठिन समयमा विद्यार्थीहरूको स्वास्थ्य र नियमित पठनपाठनलाई सहयोग पुग्ने लक्ष्यसहित जुत्ता मोजा प्रदान गरिएको हो ।

“चिसोका कारण कुनै पनि बालबालिकाको पढाइ प्रभावित नहोस् भन्ने मेरो सानो प्रयास हो। बालबालिकामा गरिएको लगानी नै समाजको उज्यालो भविष्य हो।” गँगोत्रीका प्रिन्सिपल साहले बताए ।

चिसो मौसममा साहले गरिब, विपन्न असहाय बालबालिकाहरुका लागि जुत्ता मोजा लिएर पुगेपछि अभिभावक समेत जुटेका थिए । अभिभावकहरुसहित विद्यालयका कर्र्मचारीहरुले समेत साहको सम्मान प्रशँसा गरे ।

साहले यस अघि असहाय तथा गरिबहरूको लागि जाडोको समयमा सिरक, खाधान्न वितरण गरेका थिए भने विभिन्न समयमा असहायहरूको स्वास्थ्य उपचारमा पनि सहयोग गरिरहेका छन् ।

यस किसिमका मानवीय तथा शैक्षिक सहयोगले समुदायमा सकारात्मक सन्देश प्रवाह गरेको स्थानीयले बताएका छन्। गणेश साह महेन्द्रनगरस्थित रहेको गँगोत्री स्कूल (कलेज) का सँस्थापक हुन् ।