अरु केटासँग बोलेको आशंकामा प्रेमीले नै अबिनाको हत्या गरेको खुलासा, पत्थरले हानेर गरेका थिए बेहोस

न्यूज ब्यूरो, सिरहा । सिरहाको कर्जन्हा नगरपालिका–१, बाल्टियाकी १७ वर्षीया किशोरी अबिना वैधको हत्या उनकै प्रेमीबाट भएको खुलेको छ । घटनाको करिब एक महिनापछि हत्यामा संलग्न रहेको आरोपमा धनुषाको क्षिरेश्वर नगरपालिका–३ का ४५ वर्षीय रामबालक चौधरीलाई सिरहा प्रहरीले पक्राउ गरी सार्वजनिक गरेको हो ।

प्रहरीका अनुसार पक्राउ परेका चौधरी र मृतक अबिनाबीच लामो समयदेखि प्रेम सम्बन्ध थियो । चौधरी विवाहित व्यक्ति हुन् र उनका एक सन्तानसमेत छन् । पछिल्लो समय श्रीमतीसँग विवाद भएपछि उनी अलग्गै बस्दै आएका थिए ।

गत मंसिर २२ गते दिउँसो करिब पौने ३ बजे कर्जन्हा नगरपालिका–२, स्कुल टोलस्थित कमला सिँचाइ नहर नजिकको झाडीमा सूर्यदेव वैधकी छोरी अबिनाको शव फेला परेको थियो । केन्द्रीय अनुसन्धान ब्युरो ९सीआईबी०, मधेश प्रदेश प्रहरी कार्यालय, जिल्ला प्रहरी कार्यालय सिरहा तथा इलाका प्रहरी कार्यालय मिर्चैयाको संयुक्त टोलीले गरेको अनुसन्धानबाट चौधरीले नै हत्या गरेको पुष्टि भएको सिरहा प्रहरीका प्रवक्ता डीएसपी रमेशबहादुर पालले जानकारी दिए ।

प्रारम्भिक अनुसन्धानअनुसार मंसिर २१ गते राति करिब ७ बजे धनुषाको पोर्ताहा क्षेत्रमा रहेको एक होटलमा चौधरीले मादक पदार्थ सेवन गरी अबिनालाई पटक–पटक फोन गरेका थिए । साढे ८ बजे फोनमा कुराकानी भएपछि उनले भेट्न बोलाएका थिए । त्यसपछि राति करिब सवा ९ बजे अबिना चौधरीको डेरामा पुगेकी थिइन् ।

प्रहरीका अनुसार त्यसपछि चौधरीले अबिनालाई कमला नदीको किनार हुँदै घर पु¥याउने क्रममा घटनास्थल नजिकै दुबैको सहमतिमा शारीरिक सम्बन्ध भएको खुलेको छ । अबिनाले चौधरीसँग विवाहको प्रस्ताव राख्दै आएकी थिइन् । तर अबिना अन्य पुरुषहरूसँग फोन तथा अडियो–भिडियो कलमा कुरा गर्ने गरेको विषय चौधरीलाई मन नपरेको र यही विषयलाई लिएर उनीहरूबीच पटक–पटक विवाद हुने गरेको प्रहरीले जनाएको छ ।

अन्य पुरुषसँग सम्बन्ध राखेको आशंकामा आवेशमा आएर चौधरीले अबिनाको घाँटी थिच्नुका साथै छेउमा रहेको ढुंगाले दाहिने गालामा प्रहार गरेका थिए । अबिना बेहोस भएपछि उनलाई बोकेर नजिकैको झाडीमा लगेर ढुंगाले अनुहार किची हत्या गरी फरार भएको डीएसपी पालले बताए ।

पक्राउ परेका चौधरीलाई सिरहा जिल्ला अदालतबाट म्याद थप गरी कर्तव्य ज्यान मुद्दामा थप अनुसन्धान भइरहेको जिल्ला प्रहरी कार्यालय सिरहाले जनाएको छ ।