जेसिजको ५२औँ महाधिवेशन जनकपुरमा हुनु मधेशकै लागि गौरव हुनेछः निर्देशक पजियार

न्यूज ब्यूरो, जनकपुरधाम । भोलीदेखि जनकपुरमा सुरु हुने जेसिज नेपालको ५२औँ महाधिवेशनको लागि आयोजक जनकपुर जेसिजले तयारी पुरा गरेको छ ।

जनकपुरधामको तिरुहुतिया गाछीमा आयोजन भएको जेसिजको ५२औँ महाधिवेशनको लागि जानकी मन्दिर शैलीमा पण्डाल निर्माण गरिएको छ । विहिबार पत्रकार सम्मेलन गर्दै महाधिवेशन निर्देशक जेसी सुधिर पजियारले जनकपुरधामको गौरवको रुपमा कार्यक्रम हुन लागेको दाबी गरे ।

उनले देशैभरिबाट जेसिजका प्रतिनीधिहरु हजारौँको सँख्यामा जनकपुर आएपछि चारदिनसम्म गौरवको क्षण हुने बताउँदै ५२औँ महाधिवेशन जनकपुरको लागि एक अविस्मरणीय र ऐतिहासिक दिनको रुपमा साबित हुने दाबी गरे ।

पत्रकार सम्मेलनको क्रममा निर्देशक पजियारले अधिवेशनको तयारी पूरा भईसकेको जानकारी दिए । उनले यसलाई सबै पक्ष मिलेर सफल पारिदिनको लागि अपिल गरे । पजियारले जनकपुरका सँचारकर्मीहरुको साथ र सहयोगको लागि धन्यवाद ज्ञापन गरेका थिए ।

शुक्रबारदेखि सुरु हने सो महाधिवेशन शनिबार, आईतबार, सोमबारसम्म चल्ने भएको छ । तिरहुतिया गाछीलाई जनकपुर जेसिजले नवदुल्ही झैँ सजाएको छ ।