रामजानकी मन्दिरको जग्गामा महन्थको रजाँइ, कारवाही गर्न माग

न्यूज ब्यूरो, जनकपुरधाम । रामजानकी सेवा समितिले जनकपुरधाम उपमहानगरपालिका वडा नं. १ स्थित स्टेशन एरियामा रहेको रामजानकी मन्दिरको जग्गा तथा सम्पत्ति दुरुपयोग भइरहेको आरोप लगाएको छ।

समितिले शनिबार पत्रकार सम्मेलन आयोजना गरी अनिल कुमार सिंह भनिने अनिल दास वैष्णवले मन्दिरमा जबरजस्ती कब्जा जमाई आफूलाई महन्थ–पुजारीको रूपमा प्रस्तुत गर्दै मन्दिरको सम्पूर्ण चल–अचल सम्पत्तिमा एकलौटी हकभोग गर्दै आएको दाबी गरेको हो।

पत्रकार सम्मेलनमा समितिले सार्वजनिक रामजानकी देवता मन्दिरमा अनधिकृत रूपमा प्रवेश गरी अनिल दासले मन्दिरको जग्गा, पोखरीलगायत सम्पत्तिबाट हुने आय–आम्दानी व्यक्तिगत रूपमा उपभोग गर्दै आएको तथा त्यससम्बन्धी कुनै पनि हिसाब–किताब सार्वजनिक नगरेको आरोप लगाएको छ।

समितिका अध्यक्ष रामदेव महतोका अनुसार मन्दिरको नाममा रहेको जग्गा र पोखरी ठेक्काबाट प्राप्त हुने रकम अनिल दासले एकलौटी रूपमा उपयोग गर्दै आएको र सम्बन्धित कागजातसमेत आफ्नो नियन्त्रणमा राखेको छ। उनले अनधिकृत रूपमा मन्दिरमा प्रवेश गरी कब्जा जमाएर मन्दिरको सम्पत्ति नष्ट गर्दै आएको आरोप लगाउँदै उक्त व्यक्तिलाई तत्काल पक्राउ गरी सार्वजनिक धार्मिक सम्पत्ति मुक्त गराउन र कानुनी कारबाही अघि बढाउन माग गरे।

अध्यक्ष महतोले गृहमन्त्रालयदेखि नगरपालिकासम्म प्रमाणसहित निवेदन पेस गरिसकिएको भए पनि हालसम्म मन्दिर खाली गराउनेतर्फ कुनै ठोस पहल नदेखिएको गुनासो गरे। समितिले सार्वजनिक धार्मिक सम्पत्तिको संरक्षणका लागि सम्बन्धित निकायले शीघ्र हस्तक्षेप गर्न माग गरेको छ।