धनुषाको गोदारमा कमसल कामको आरोप, पर्खालमा पर्न थाल्यो चिर्रा, मोतीदान कन्स्ट्रक्सन विवादको घेरामा

न्यूज ब्यूरो, धनुषा । धनुषाको गणेशमान चारनाथ नगरपालिका–७ अन्तर्गत पूर्व–पश्चिम लोकमार्गको गोदार चौकमा मोतीदान कन्स्ट्रक्सनले निर्माण गर्दै आएको नालामा गम्भीर लापरवाही भएको स्थानीयले आरोप लगाएका छन्।

निर्माणस्थलमा कमसल सामग्री प्रयोग, मापदण्ड विपरीत काम, तथा प्राविधिक निरीक्षणको अभाव जस्ता समस्या खुलेआम देखिएको स्थानीयको गुनासो छ।

स्थानीय बासिन्दाका अनुसार बालुवा, गिट्टी, सिमेन्टलगायत सामग्रीको गुणस्तर न्यून छ। नालाको ढलान, पर्खाल तथा फिनिशिङतर्फ पनि प्राविधिक त्रुटिहरू स्पष्ट देखिने स्थानीयको दाबी छ।

उनीहरूका अनुसार, “सरकारले बजेट दिएको छ, तर काम भने ठेकेदारले मनलाग्दी ढङ्गले गरिरहेको छ।”

कामबारे बुझ्न स्थानीयले निर्माण कम्पनीसँग लागत एस्टिमेट,डीपीआर, वर्क–अर्डर लगायत आवश्यक कागजात माग्दा समेत कम्पनीले नदिएको जनाइएको छ।
सार्वजनिक निर्माणमा अनिवार्य रूपमा राखिनुपर्ने सूचना पाटी पनि कहीं कतै नराखिएको स्थानीयको भनाइ छ।

नाला निर्माणका यस्तो लापरवाहीले वर्षायाममा पानी जम्ने, नाला चिरिने वा भत्किने, तथा बस्तीमा जोखिम बढ्ने सम्भावना रहेको स्थानीयले चिन्ता व्यक्त गरेका छन्। उनीहरूका अनुसार, यस्तो गैरजिम्मेवार कामले जनताको करको पैसा दुरुपयोग हुनुका साथै विकास कार्यको विश्वसनीयता नै खल्बलिने अवस्थामा पुगेको छ।