आफ्नो गाउँ आफै बनाउन गाउँका युवाहरु जुटे श्रमदानमा, नियमित श्रमदान गर्दै युवाहरु

न्यूज ब्यूरो, जनकपुरधाम । पूर्वी धनुषाको कमला नगरपालिकाको एक गाउँका युवाहरुले आफ्नो गाउँ आफैँ बनाउन अग्रसर भएका छन् ।

कमला नगरपालिका वडा नं. ७ हथमुण्डा नवकाटोलका युवाहरुले स्थानीय सरकार वा कुनै सरकारको भरमा नभई आफ्नो गाउँको विकास आफैँ गर्ने अठोट लिएका छन् ।

स्थानीय अगुवा रामभगत मण्डलको अगुवाईमा गाउँका युवा, किशोर र वश्यकहरुले समेत श्रमदानमा जुटेका छन् । गाउँमा स्थानीय सरकारले ध्यान नदिएपछि उनीहरुले आफ्नो गाउँ आफैँ बनाउने निधो गरेका छन् ।

स्थानीय सरकारको बजेटले कुनै विकास नभएको भन्दै युवाहरुले गाउँको समुचित विकासको लागि प्रत्येक शनिबार सम्पूर्ण गाउँले मिलेर श्रमदानमा लागेका छन् । उनीहरुले स्वेच्छाले श्रमदानमा लागेका छन् ।

गाउँको गल्ली गल्ली, सडक, बगैँचा, सार्वजनिक स्थल, बगहारा, कृषि सडक लगायत गाउँमा सरसफाईमा समेत श्रमदान दिन थालेका छन् । उनीहरुले एक बर्षभित्र श्रमदानबाटै गाउँलाई सफा र सुन्दर गाउँ बनाउने अठोट लिएको बताइएको छ ।