फेसबुक बन्द गर्ने निर्णयपछि META सरकाको सम्पर्कमा, दर्ता हुन माग्यो फाराम !

न्यूज ब्यूरो, जनकपुरधाम । फेसबुक सञ्चालक संस्था मेटाले नेपालमा कम्पनी दर्ताका लागि आवश्यक कागजातबारे विवरण मागेको छ।

सञ्चार तथा सूचना प्रविधि मन्त्रालयका सहसचिव एवं प्रवक्ता गजेन्द्रकुमार ठाकुरका अनुसार मेटाका प्रतिनिधिले मन्त्री रेणुका गुरुङका विज्ञ सल्लाहकार शालिकराम पराजुलीलाई इमेलमार्फत् सो बारे जानकारी लिएका हुन्।

“पौने ५ बजे मेटाका कोही प्रतिनिधिले मन्त्रीज्यूका विज्ञ सल्लाहकारलाई दर्ता प्रक्रियाका लागि आवश्यक कागजातबारे सोध्दै इमेल गर्नुभएको रहेछ,” उनले भने, “हामीले पाँच मिनेटभित्रै सामाजिक सञ्जाल प्लेटफर्म दर्ता हुन आवश्यक पर्ने कागजातहरूको विवरण पठाएका छौं।”

सरकारले चरणबद्ध रूपमा सूचीकृत नभएका सामाजिक सञ्जालहरू सञ्चालनमा रोक लगाउने निर्णय गरिसकेको छ। यससँगै सामाजिक सञ्जाल प्रयोगकर्ता तथा सेवा प्रदायकहरूबीच चहलपहल बढेको छ।

नेपाल दूरसञ्चार प्राधिकरणले इन्टरनेट प्रदायक कम्पनीहरूलाई २६ वटा सामाजिक सञ्जाल बन्द गर्न निर्देशनसमेत दिइसकेको छ।