सिरहा कारागारमा कैदीबन्दीबीच झडप , नाईके महतोसहित १३ जना घाइते, दुईको अवस्था गम्भीर !

न्यूज ब्यूरो, सिरहा । सिरहा जिल्ला कारागारमा आइतबार कैदीबन्दीबीच झडप हुँदा १३ जना घाइते भएका छन्। सुरक्षाका दृष्टिले हटाउन भनिएका सामग्री हटाउने क्रममा विवाद उत्पन्न भई झडप भएको हो।

साउन ३ गते गरिएको अनुगमनमा कारागारभित्र फलामको रड, दाउरा, इँटा, फलाम काट्ने मेसिनलगायत सामग्री देखिएको थियो। ती वस्तुले सुरक्षामा खतरा पुर्‍याउन सक्ने भन्दै साउन ४ मा हटाउन थालिएको थियो। तर, हटाउने क्रममा अस्थायी चौकीदार विजय कुमार महतोले डरत्रास देखाउँदै ज्यादती गरेपछि केही कैदी आक्रोशित बनेर झडप भएको प्रहरी स्रोतले जनाएको छ।

झडपमा १३ जना घाइते भएका छन्। घाइतेमध्ये दुई जनाको अवस्था गम्भीर रहेको छ भने अन्यको अवस्था सामान्य रहेको प्रहरीले जनाएको छ।

प्रारम्भिक उपचारका लागि सबैलाई प्रादेशिक अस्पताल सिरहा पुर्‍याइएको थियो। गम्भीर घाइतेलाई थप उपचारका लागि काठमाडौं रिफर गरिएको छ।

घटनापछि जिल्ला प्रहरी कार्यालय सिरहाबाट प्रहरी नायब उपरीक्षक (प्र.ना.उ.) विरेन्द्र पासवानको कमान्डमा ३० जना सुरक्षाकर्मी कारागारमा खटिएका थिए। अस्पताल सुरक्षाका लागि प्रहरी निरीक्षक (प्र.नि.) आकाश उप्रेतीको कमान्डमा थप १५ जना प्रहरी परिचालन गरिएको थियो।

झडपमा घाइते हुनेहरूमा अस्थायी चौकीदार विजय कुमार महतोसहित मकेश्वर महतो (बर्दिबास–६, महोत्तरी), दिपक ठाकुर (मधुबनी, बिहार), अञ्जली कुशवाहा (कर्जन्हा–७, सिरहा), रिपेन्द्र झा (महोत्तरी–१), जयप्रकाश चौधरी (बिसंहरीया–८, सप्तरी), शिव कुमार राय (सहिदनगर–१, धनुषा), दिपेन्द्र कुमार यादव (लहान–५, सिरहा), सन्तोष कुमार सिंह (औरही–१, सिरहा), सत्य नारायण कारक (सिरहा नगरपालिका–२०), जितन साह (मिर्चैया–७, सिरहा), विश्वमित्र महतो 'बरुण' (कर्जन्हा–२, सिरहा) र बैजु दास (जनकपुर उपमहानगरपालिका–१५, धनुषा) रहेका छन्।

प्रहरीले घटनाबारे थप अनुसन्धान जारी रहेको जनाएको छ।