मिथिला बिहारी नगरपालिकामा ड्रैगन फ्रुट खेतीबारे तालिम, आम्दानीको नयाँ विकल्प

न्यूज ब्यूरो, जनकपुरधाम । जलवायु परिवर्तनको असर न्युनिकरण गर्ने र कृषि प्रणालीलाई नविनतम प्रविधिसँग जोड्ने उद्देश्यले मिथिला बिहारी नगरपालिका–१०, ठेरामा लक्ष्मी बहुउद्देश्यीय मत्स्य तथा पशुपंक्षी पालन फार्म र GGGI (Global Green Growth Institute) को सहकार्यमा सञ्चालित जलवायु मैत्री कृषि परियोजना TAFC Challenge Fund अन्तर्गत २ दिने ड्रैगन फ्रुट खेती तालिम गोष्ठी संचालन भएको छ।

कार्यक्रममा प्रमुख अतिथि नगर प्रमुख राजेन्द्रप्रसाद यादव, विशिष्ट अतिथि उपप्रमुख शोभा देवी साह, अतिथि प्रमुख प्रशासकीय अधिकृत नागेन्द्र यादव, वडा नं. १० का वडा अध्यक्ष तथा फार्म संचालक ललित नारायण झा लगायतको उपस्थिति थियो।

कार्यक्रममा लक्ष्मी बहुउद्देश्यीय फार्मकी संचालिका लक्ष्मी देवी झाको अध्यक्षता मिथिला बिहारी नगरपालिका कृषि शाखा प्रमुख गोबिन्द यादवले गरेका थिए प्रशिक्षक उमेश कुमार महतो रहेको थियो ।
तालीम गोष्ठी कार्यक्रममा मिथिला बिहारी नगरपालिकाका ३० जना किसानहरु सहभागी रहेका थिए । सहभागी किसानलाई ड्रैगन फ्रुटका बिरुवा निःशुल्क वितरण गरिने वडा अध्यक्ष झा ले जानकारी गराएका छन ।

ड्रैगन फ्रुट अत्यधिक पोषक तत्वयुक्त (Vitamin C, Fiber, Calcium) एकपटक रोपेर १०–१५ वर्षसम्म उत्पादन लिन सकिने कम कीटनाशक र सजिलो व्यवस्थापन बजार मूल्य प्रति केजी रु. ४००-७००दीर्घकालीन व्यवसायिक लाभदायक बाली रहेको जानकारी गराए थिए ।

कार्यक्रममा स्वागत मन्तव्य दिंदै वडा अध्यक्ष झाले, “तालिम पछि सहभागी किसानलाई बिरुवा वितरण हुनेछ, र आगामी ६ महिनाभित्र कम्तीमा ५ जनाले खेती शुरू गर्नेछन्। यसलाई तालिमको प्रत्यक्ष उपलब्धि मान्न सकिन्छ।”

प्रमुख प्रशासकीय अधिकृत नागेन्द्र यादवले भने, “ड्रैगन फ्रुट खेती मिथिला बिहारीको नमूना बन्नेछ। अब कृषि मार्फतै युवालाई रोजगारी दिने प्रयास नगरपालिका गर्नेछ।”

नगरप्रमुख राजेन्द्र यादवले जोड दिँदै भने, “पहिला यो फल ठूला सहरको सुपरमार्केटमै सीमित थियो। अब गाउँका किसानले यसको व्यावसायिक खेती गरेर राम्रो आम्दानी गर्न सक्छन्। नगरपालिका तर्फबाट आवश्यक सहयोग उपलब्ध गराइनेछ।”

GGGI को सहकार्यमा सञ्चालित उक्त परियोजनाले कृषिमा वातावरणीय सन्तुलन, उत्पादनशीलता, र रोजगारी सिर्जनालाई जोड दिने उद्देश्य राखेको छ। ड्रैगन फ्रुट खेती त्यसैको एउटा नमुना अभ्यासको रूपमा अगाडि बढाइएको हो।