जसपाका प्रदेश साँसद कुशवाहाको घरमा अख्तियारको छापा, पिए समेत पक्राउ

न्यूज ब्यूरो, जनकपुरधाम । जनता समाजवादी पार्टी (जसपा) नेपालका मधेश प्रदेश सांसद सरोजसिंह कुशवाहाको घरमा अख्तियार पसेको छ।

महोत्तरी क्षेत्र नम्बर–४ (ख) बाट निर्वाचित सांसद कुशवाहाको घरमा अख्तियार दुरुपयोग अनुसन्धान आयोगले सोमबार छापा मारेको छ।

उनका स्वकीय सचिव विनोदकुमारलाल कायस्थलाई पक्राउ गरी घरमा रहेका विभिन्न योजनाका कागजातहरू समेत नियन्त्रणमा लिएको अख्तियार स्रोतले जनाएको छ।

प्रदेश सांसद कुशवाहा भने सम्पर्कविहीन रहेको अख्तियार स्रोतको भनाइ छ। कुशवाहाको भागमा परेका योजनाहरू बिक्री गरेको भने गोप्य सूचनाको आधारमा छापा मारिएको जनाईएको छ।

कुशवाहा महोत्तरी ४ (ख) बाट दोस्रो पटक निर्वाचित सांसद हुन भने मधेश प्रदेश सरकारका पूर्वआन्तरिक मामिला तथा कानुन राज्यमन्त्री पनि हुन।

सोमबार गरिएको छापामारीको क्रममा अख्तियारले साँसद महतोको घरबाट योजना बिक्रीको प्रमाण, कागजातहरु फेला पारेको हो ।