कुशवाहाको मन्त्री मोड एक्टिभेटः १ लाख रोजगारीको नीति कार्यक्रम ल्याउने तयारी

न्यूज ब्यूरो, जनकपुरधाम । मधेश प्रदेशका नवनियुक्त उद्योगमन्त्री ई. बसनत कुशवाहाले मधेशमा एक लाख रोजगारी सृजनाको लागि नीति कार्यक्रम ल्याउन लागेका छन् ।

नेपाल होटेल तथा पर्यटन व्यवसायी महासङ्घ मधेश प्रदेशको आयोजनामा शनिबार वीरगन्जमा आयोजित कार्यक्रमलाई सम्बोधन गर्दै उद्योग, वाणिज्य तथा पर्यटनमन्त्री बसन्त कुशवाहले सरकारले रोजगारी सिर्जनाका लागि आवश्यक गृहकार्य गरिरहेको जानकारी दिए।

‘मधेश प्रदेशको लगानी सम्भाव्यताका क्षेत्र कृषि, उद्योग तथा पर्यटन हुन्,’ उनले भने, ‘यी क्षेत्रमार्फत रोजगारी सिर्जना गर्ने उद्देश्यसाथ कार्यक्रम ल्याउने तयारी भइरहेको छ।’

मन्त्री कुशवाहाले नयाँ पर्यटकीय गन्तव्य पहिचान गर्नेलाई सरकारले प्राथमिकता दिएको बताए। ‘टुक्रे योजना होइन, अब निश्चित गन्तव्य निर्माणमा लगानी गर्न गृहकार्य भइरहेको छ,’ उनले भने।