सिरहामा छुट्टाछुट्टै स्थानमा सबारी दुर्घटना हुँदा एकको मृत्यु, ४ जना घाइते

न्यूज ब्यूरो |

सिरहा, १६ असार । ट्रकमा मोटरसाइकल ठोक्किँदा सिरहामा एकजना युवकको मृत्यु भएको छ । पूर्वपश्चिम राजमार्गअन्तर्गत् सिरहाको मिर्चैया नगरपालिका–२ स्थित सडकमा आज (शनिबार) बिहान ट्रकमा मोटरसाइकल ठोक्किँदा मोटरसाइकल चालकको मृत्यु भएको हो ।

पूर्वबाट पश्चिमतर्फ जाँदै गरेको ना २८ प ४८३७ नम्बरको मोटरसाइकल सडकछेउमा रोकिएको ना १ ख ७४०२ नम्बरको ट्रकमा ठोक्किँदा मोटरसाइकल चालक रौतहटको देवाही गोनाइ नगरपालिका–३ निवासी ३० वर्षीय राजकिशोर जैसवालको ज्यान गएको छ ।

दुर्घटनामा परी गम्भीर घाइते भएका जैसवाललाई उपचारका लागि अस्पताल लैजाँदै गर्दा बाटोमै मृत्यु भएको इलाका प्रहरी कार्यालय मिर्चैयाका डिएसपी दिपक कुमार खड्काले जानकारी दिनुभयो ।

सोही दुर्घटनामा परी मोटरसाइकलमा पछाडि सवार सर्लाहीको घोराही नगरपालिका–६ निवासी २५ वर्षीय सरोजकुमार चौधरी गम्भीर घाइते भएको र उनको विराटनगरस्थित न्यूरो अस्पतालमा उपचार भइरहेको इप्रका मिर्चैयाले जनाएको छ ।

यस्तै, पूर्वपश्चिम राजमार्गअन्तर्गत् कर्जन्हा नगरपालिकास्थित सडकमा शनिबारै बिहान दुईओटा मोटरसाइकल एकापसमा ठोक्किँदा तीनजना घाइते भएका छन् । घाइतेको कर्जन्हा अस्पतालमा उपचार भइरहेको प्रहरीले जनाएको छ ।