कोशी नदीमा पुलमाथिबाट चल्न थाल्यो बाढी, आवतजावतमा बन्द

न्यूज ब्यूरो, सप्तरी । देशको ठुलो ब्यारेज कोशी ब्यारेजको पुलमाथिबाट पानी चल्न थालेपछि आवतजावत बन्द गरिएको छ ।

सुनसरीका प्रहरी उपरीक्षक विपिन रेग्मीका अनुसार शनिबार अपरान्ह चार बजे ५ लाख ४९ हजार क्युसेक बाढी मापन भएको छ ।

बाढी कोशीको पुलमाथिबाट पनि बगेको उनले बताए । बाढीको बहाव उच्च भएपछि कोशीमा सवारी आवतजावत पनि बन्द गरिएको उनले बताए ।

यहाँ शनिबार साँझ मापन गरिएको साढे ५ लाख क्युसेक पानी ३७ वर्षयताकै उच्च हो । यसअघि सन् १९८७ मा ५ लाख २३ हजार क्युसेक मापन भएको थियो ।