क्षीरेश्वरनाथ नपामा जनमत पार्टीको माग ३० दिनभित्र सम्बोधन हुन्छः मेयर यादव

न्यूज ब्यूरो, जनकपुरधाम । धनुषाको क्षीरेश्वरनाथ नगरपालिकाका मेयर सुखदेव यादवले जनमत पार्टीले माग गरेको विभिन्न बुँदाहरुको सम्बोधन ३० दिनभित्र गरिने प्रतिवद्धता जाहेर गरेका छन् ।

यसअघि डा. सिके राउत नेतृत्वको जनमत पार्टीले विभिन्न मागहरु राखी क्षीरेश्वरनाथ नगरपालिकामा चरणवद्ध आन्दोलन गर्दै आएकोमा जिल्ला प्रशासन कार्यालय धनुषाको रोहबरमा माग सम्बोधनको समय दिएको हो ।

नगर प्रमुख यादवले जनमत पार्टीको नगर कार्य समितिको तर्फबाट सम्बोधन गर्न दिएको विभिन्न मागहरुप्रति विचार गर्दै आगामी ३० दिनभित्र सम्बोधन गर्ने प्रतिवद्धता जनाएको हो । माग सम्बोधनको लिखित आश्वासन दिएपछि जनमतले आन्दोलन समेत स्थगित गर्ने निर्णय भएको हो ।

बुधबार जिल्ला प्रशासन पुगेका मेयर सुखदेव यादवसहित प्रमुख प्रशासकीय अधिकृत, कर्मचारी, जनमतको तर्फबाट नेता कार्यकर्ताहरुबीच आपसी सहमति लिखित रुपमै भएपछि आन्दोलनको कार्यक्रम स्थगित गर्ने भएको हो । ३० दिनभित्र माग सम्बोधन नभए आन्दोलन पुनः गर्ने चेतावनी समेत दिएको हो ।

जनमतको क्षीरेश्वरनाथ नपा कार्य समितिका अध्यक्ष गुल्जारीलाल सिँहको अगुवाईमा पालिकाभित्र नियमति हुनुपर्ने कार्यहरु अविलम्ब सुचारु हुनुपर्ने, गत आर्थिक बर्षमा भएको कार्यक्रमहरुको सूचना दिनुपर्ने, सरकारी विद्यालयको अवस्था सुधार गर्नुपर्ने, कुनै पनि कार्यक्रम हुँदा जनमत पार्टीको सहभागीता अनिवार्य हुनुपर्ने, असहाय, गरिब, विपन्न वर्गका बालबालिकाहरुलाई निःशुल्क शैक्षिक समाग्री उपलब्ध गराउनुपर्ने लगायतका १३ बुँदे माग अघि सारेको थियो ।