मिर्चैयामा मेसिनमा किचिएर एक कामदारको ज्यान गयो

न्यूज ब्यूरो |

सिरहा, १ असार । सिरहामा एक उद्योगको मेसिनमा किचिएर एकजना कामदारको घटनास्थलमै मृत्यु भएको छ । सिरहाको मिर्चैया नगरपालिका ५ साँझा चोकस्थित रहेको श्री बजरंग चिप्स उद्योगमा चिप्स बनाउने मेसिनमा किचिएर आज (शुक्रबार) एक कामदारको घटनास्थलमै ज्यान गएको हो ।

उद्योगका कामदार स्थानीय ६० वर्षीय लक्षमण साफीको मृत्यु भएको ईलाका प्रहरी कार्यालय मिर्चैयाले जनाएको छ । दिउँसो करिब ४:३० बजे उद्योगको मेसिन चलाउने क्रममा मेसिनमै किचिएर मृत्यु भएको प्रहरीले जानकारी दिए ।

मृतक साफीको शव पोस्टमार्टमको लागि लहान अस्पताल लगिएको ईप्रका मिर्चैयाले जनाएको छ ।