एक बदनाम अधिकृत- 'सर्वजीत झा' जहाँ गए, सबै डुबाए !

न्यूज ब्यूरो, जनकपुरधाम । मधेश प्रदेशको विभिन्न जिल्लाको स्थानीय तहमा कार्य भ्रमण गरेका अधिकृत सर्वजीत झा एक बदनाम अधिकृतको रुपमा साबित हुँदै गएका छन् ।

लोकसेवा लडेर शाखा अधिकृतमा नाम निकालेपछि अहँकारले मातेका अधिकृत सर्वजीत झा अहिलेसम्म जुन जुन स्थानीय तहमा गएका छन सबै पालिकालाई विवादको धब्बा लगाएर भागेको रेकर्ड छ ।

लोकसेवा आयोगबाट लडेर शाखा अधिकृतमा नाम निकालेपछि स्थानीय तहमा उनले दुई बर्षभित्र ७ बढी पालिकालाई विवादको धब्बा लगाए । जहाँ गएपनि एकलौटी र अहँकारी ढँगले कार्य सम्पादन गर्न खोजेपछि जनप्रतिनीधिसँगको खटपटले उनी एक बदनाम अधिकृतको रुपमा चिनिन थालेका छन् ।

सुरुमा कालिकोट पोस्टिँग पाएका अधिकृत झाले दुई बर्षमा आधा दर्जन बढी स्थानीय तहमा सरुवा भएका छन् । केही दिन बसेर पालिकालाई विवादमा तानेर भाग्ने उनको प्रकृतिले उनलाई अब मधेशको जिल्लाहरुको स्थानीय तहले अधिकृतको रुपमा राख्न डराउन थालेका छन् । उनको प्रवृति सँचारमाध्यमहरुमा आउन थालेपछि उनी एक बदनाम अधिकृतको रुपमा चिनिन थालेको हो ।

कालिकोटपछि सप्तरी, धनुषाको जनकनन्दिनी, महोत्तरीको पिपरा गाउँपालिका, सिरहाको औरही गाउँपालिका लगायत विभिन्न पालिकाहरुमा उनले विवाद खडा गरेको रेकर्ड छ । जनकनन्दिनीमा गाउँपालिका अध्यक्षसँग टशन चलेपछि उनी भाग्न बाध्य भएका थिए । पिपरा गाउँपालिकामा कर्मचारीहरुले खेदेपछि उनी भाग्न बाध्य भए भने अहिले सिरहाको औरही गाउँपालिकामा समेत कर्मचारीहरुले उनलाई भगाउन आन्दोलन चर्काएको हो ।

अधिकृत झालाई अविलम्ब सरुवा गर्न कर्मचारीहरुले सँयुक्त रुपमा गाउँपालिका अध्यक्षलाई ज्ञापन पत्र बुझाएको हो । अधिकृत झाले जतिबेला पनि “आफू शाखा अधिकृत हो” भनेर रट लगाउँदै अन्य कर्मचारीहरुलाई गन्दै नगनेको आरोप छ ।

यसअघि असार मसान्तमा सिरहाको औरही गाउँपालिकामा बिना कमिशन चेक वितरण नगरेको आरोप खेपेका उनलाई औरहीबाट समेत भगाउने तयारी भएपछि सर्वजीत कुमार झा एक बदनाम अधिकृतको रुपमा चिनिन थालिएको हो ।

यता, अधिकृत झाले भने पालिकाहरुको रोकिएको कार्यहरु आफू सूचारु गरेको प्रतिक्रिया दिए । उनले विभिन्न पालिकामा जाँदा रोकिएका विभिन्न कार्यहरु सुचारु गरी कार्य सम्पादन गरेको बताए । अधिकृत झाले पालिकाहरुमा जनप्रतिनीधिहरुको कारण रोकिएको कार्यहरु सुचारु गर्दा विभिन्न आरोप प्रत्यारोप लागेको बताए ।

उनले उत्तम कार्य सम्पादन गर्न खोज्दा कर्मचारी, जनप्रतिनीधिहरु रुष्ठ भएको बताए । यहाँको कार्यशैलीलाई परिवर्तन गर्न खोज्दा विभिन्न आरोप प्रत्यारोप लागेको भन्दै उनले खण्डन गरे ।