पत्रकार महासंघ धनुषामा पार्टीका कार्यकर्तालाई पनि सदस्यता, 'प' लेख्न नजान्ने छोरी श्रीमति पनि पत्रकार

न्यूज ब्यूरो, जनकपुरधाम । नेपाल पत्रकार महसंघ धनुषा शाखाकी वर्तमान अध्यक्षको कार्यकाल विवादपूर्ण रहयो । सदस्यता शुद्धिकरण समेत गर्न नसकेकी वर्तमान अध्यक्ष मनिका झाको आफ्नै पदाधिकारीहरुसँग कहिल्यै चुर मिलेनन् । जसको परिणाम धनुषा शाखामा अहिले देशैभरिको महासंघभन्दा अधिक बेतिथि देखिएको छ ।

निरन्तर विवादमै रहँदै आएको नेपाल पत्रकार महासँघ धनुषा शाखामा चुनाव नजिकिएपछि केन्द्रीय कार्यालयबाट जारी भएको सदस्यता सूचिमा पार्टीका कार्यकर्ताहरुलाई समेत सदस्यता वितरण गरिएको छ ।

पत्रकारिता क्षेत्रमा सक्रिय नै नरहेको विभिन्न राजनीतिक पार्टीका व्यक्तिहरुलाई सदस्यता दिएपछि महासंघको पदाधिकारीको कर्ततु छत्ताछुल्ल भएको छ । भोंटको राजनीतिक दलझै पार्टी प्रवेश गराउने प्रचलन अनुरुपै आफ्नो मान्छेलाई सदसयता वितरण गर्ने प्रणाली लगाएपछि पत्रकार महासंघप्रतिको विश्वास न्यून भएको अवस्था छ ।

महासंघको केन्द्रीय कार्यालयले जारी गरेको सदस्यतामा नेपाली काँग्रेस, एमाले, जसपा, माओवादीका कार्यकर्ताहरुलाई समेत सदस्यता वितरण गरिएको छ । धनुषाको क्षीरेश्वरनाथ नगरपालिकाका काँग्रेसका नगर उपाध्यक्ष अजय साहलाई सदस्यता नविकरण गरिएको छ । सोही नगरपालिकामा रोजगार संयोजकको पदमा समेत कार्यरत साहलाई महासंघले सदस्यता नविकरण गरिदिएको हो ।

यस्तै, नेपाली काँग्रेस पार्टीकै प्रफुल्ल घिमिरेलाई समेत सदस्यता दिइएको हो । काँग्रेस निकट मानिएका राहत शिक्षकमा कार्यरत किशोर कुमार मण्डललाई सदस्यता दिइएको देखिएको छ ।

भोला यादव, धीरेश दत्त पेशाले शिक्षक हुन् । पत्रकार महासंघको चुनावमा भोट बैँक बनाउनको लागि शिक्षकहरुलाई समेत महासंघको सदस्यता प्रदान गरिएको देखिएको छ ।

सोही क्रममा जसपाकी कार्यकर्ता पुष्पा यादव र स्मृति मिश्रलाई समेत सदस्यता दिइएको देखिएको छ । पत्रकार महासंघको केन्द्रीय कार्यालयले जारी गरेको धनुषा शाखाको सूचिमा नयाँ सदस्यतातर्फ जसपाको भातृ सँगठनसँग आवद्ध पुष्पा यादव र स्मृति मिश्रलाई सदस्यता प्रदान गरिएको छ । स्मृति मिश्र गोरखापत्रमा कार्यरत हुन् । पुष्पा यादव प्रदेश सरकारको चलचित्र विकास बोर्डकी सदस्य पनि हुन् ।

महासंघले पत्रकारिता नै नरहेको पूर्व सँचारकर्मी प्रविण साहकी श्रीमति चन्दा साहको सदस्यता नविकरण गरेको हो । प्रविण साह अमेरिकन कम्प्यूटर सेन्टरका सँचालक समेत हुन् ।

सोही क्रममा चुरोट बेच्ने संजीव साहलाई समेत सदस्यता दिइएको छ । पसलमा चुरोट सप्लायर्सको काम गर्दै आएका संजीव साहलाई पत्रकार महासंघले सदस्यता दिएको हो । पत्रकारितामा सक्रिय नै नरहेका अकुल प्रसाद साह (व्यापारी) लाई सदस्यता दिएको हो । यद्यपी, आफ्नो मान्छेको सदस्यताको लागि मँगलबार पत्रकार महासंघ धनुषा शाखामा तालाबन्दी उनले नै गर्न गएका थिए । अकुल प्रसाद साह भूमिगत पत्रकारको नामले चिनिन्छन् ।

नयाँ सदस्यतामा पत्रकार उपेन्द्र भगत नागवंशीकी छोरी कुरमुर नागवंशीलाई पनि सदस्यता दिइएको देखिएको छ । समाचार क्षेत्रमा कार्यरत नै नरहेकी बन्दना नायकलाई पनि सदस्यता दिइएको छ । यद्यपी, उनीहरुले भने आफू पत्रकार रहेको दाबी गर्दै आएकी हुन् ।

विभिन्न राजनीतिक पार्टीको सँगठनसँग आवद्ध रहेको नेपाल पत्रकार महासंघ धनुषा शाखाका पदाधिकारीहरुले आ–आफ्नो मान्छे राखेर भोँट असुल्ने कार्य गर्दै आएका छन् । राजनीतिकर्तामाथि सधैँ प्रश्न तेर्साउने चौथो अंग मानिने महासंघसँग आवद्ध पत्रकारहरुको यी कर्तुतले सिँगो सँचार जगतको छवि धुलाम्य भएको छ ।

केन्द्रीय कार्यालले जारी गरेको सदस्यता सूचिमा देवताकुमारी झा, सँतोष कुमार मिश्र, धीरेन्द्र झा, मो. हासिम राईन, हरिवंश यादवलाई समकक्षता आवश्यक भनेर कैफियत पठाएको हो ।