पत्रकार महासंघ धनुषामा गैर पत्रकारहरुको जमात, नेतादेखि तस्करसम्मलाई सदस्यता

न्यूज ब्यूरो, जनकपुरधाम । नेपाल पत्रकार महासंघ धनुषा शाखा (जनकपुर) मा गैर पत्रकारहरुलाई सदस्यता वितरण गरिएको छ ।

नेपाल पत्रकार महासंघको केन्द्रीय समितिले जारी गरेको सूचि अनुसार राजनीतिक दलका नेतादेखि तस्करलाई समेत पत्रकार महासंघको सदस्यता वितरण गरिएको हो । राजनीतिक दलका नेताहरुलाई पहिलेदेखि नै सदस्यता नविकरण गरेको हो भने नयाँ सदस्यतामा तस्करलाई समेत समावेश गरिएको देखिएको छ ।

महासंघले जारी गरेको धनुषा जिल्ला शाखाको १३६ जनाको सूचिमा काँग्रेसका नेतादेखि लिएर तस्करलाई समेत सदस्यता दिइएको हो । नेकपा माओवादी (केन्द्र) निकट रहेकी वर्तमान अध्यक्ष मनिका झा मातहतकी पदाधिकारीहरुले आ–आफ्ना अनुकुलका व्यक्तिहरुलाई पत्रकार महासंघको सदस्यता वितरण गरेको हो ।

पत्रकारिता पेशा छाडेर अर्कै पेशामा लागिसकेको व्यक्तिहरुको सदस्यता नविकरण गरिएको छ भने पत्रकारिता नै नगरेका व्यक्तिहरुलाई समेत सदस्य बनाईएको हो ।

जसमा दिनेश शर्मा, शैलेश लाल दास, राम हृदय प्रसाद यादव, अभय कुमार शर्मा, ज्ञानेन्द्र ठाकुर, जयशंकरनाथ झा, चन्दा कुमारी साह, सँजय कुमार यादव, राहुल कुमार सिँह, दिपक कुमार मिश्र, राहुल सिँघानिया, जीवनारायण झा, आलोक ठाकुर, रमेश रञ्जन झा, राजेन्द्र ललन लगायतका व्यक्तिहरु पत्रकारिताबाट विश्राम लिसकेका छन् । धनुषाको पत्रकारिता क्षेत्रमा निष्कृय रहेका उनीहरुको सदस्यता भोँटको लागि नविकरण गरिएको हो ।

उनीहरुमध्ये रामहृदय प्रसाद यादव, जीवनारायण झा, सँजय कुमार यादव, राहुल कुमार सिँह, राहुल सिँघानियाँ, रमेश रञ्जन, दिपक मिश्र, नवोनारायण झा, लगायतले पत्रकारिता छाडेर आफ्नै बिजनेसमा सक्रिय भएका छन् यद्यपी उनीहरुको सदस्यता भने नविकरण गरिएको हो ।

महासंघको सूचिमा रहेको प्रफुल्ल घिमिरे नेपाली काँग्रेस पार्टीका नगरका नेता हुन् । अझै नेपाली काँग्रेस पार्टीमै सक्रियता जारी राखेका उनलाई समेत पत्रकार महासंघको सदस्यता दिइएको हो ।

यस्तै, नयाँ सदस्यतामा राजन कुमार झा, मो. हासिम राईन, सपना कुमारी कर्ण लगायत पत्रकारितामा सक्रिय नै नरहेको बेला उनीहरुलाई नयाँ सदस्यता दिइएको हो ।

सो क्रममा पूर्व प्रमुख जिल्ला अधिकारी भएर अवकाश प्राप्त कर्मचारी राजेन्द्र झालाई समेत सदस्यता वितरण गरिएको हो । पत्रकार महासंघ पूर्व केन्द्रीय अध्यक्ष धर्मेन्द्र झा र नेपाल पत्रकार महासंघका पूर्व केन्द्रीय सदस्य शैलेन्द्र झाको बुवा समेत रहेका राजेन्द्र झालाई महासंघको सदस्यता दिइएको हो ।

सरकारी कर्मचारीबाट अवकाश प्राप्त भई नेपाल सरकारको पेन्सन खाईरहेको झालाई महासंघको सदस्यता दिइएको हो ।

नयाँ सदस्यतामध्ये अनिल कुमार शाह एक नयाँ नाम हुन् । पूर्वी धनुषाको सीमा क्षेत्रमा भारतबाट भन्सार छलीको समान ओसार पोसार गर्ने शाहलाई समेत पत्रकार महासंघको सदस्यता दिइएको हो । जानकारी अनुसार उनी कुनै मिडियामा कार्यरत छैनन न पत्रकारिता गर्दैछन् । नेकपा माओवादी (केन्द्र) पार्टी निकटका पत्रकारहरुले उनलाई भोंट बैँकको रुपमा परिचालन गर्न सदस्यता दिइएको बुझिएको हो ।

धनुषाको तिनकोरिया क्षेत्रमा तस्करी गर्दै आएका शाहलाई धनुषाकै केही पत्रकारले व्यक्तिगत प्रयोजनको लागि उनलाई सदस्यता दिलाएको बुझिएको छ ।

यता, नेपाल पत्रकार महासंघको मधेश प्रदेश समितिले केन्द्रीय कार्यालयको सदस्यता वितरणप्रति विरोध जनाएको हो । नामै नदिएको, मृत्यू भईसकेको, कर्मचारी भईसकेको, पत्रकारिता छोडिसकेको व्यक्तिहरुको समेत नामावली नविकरण गरिदिएको र पत्रकारितामै नरहेको व्यक्तिलाई सदस्यता दिएकोप्रति आपत्ति जनाउँदै विरोध जनाएको हो ।