सार्वजनिक यातायातमा विद्यार्थीलाई ४५% छुट दिन धनुषाका सिडिओलाई विद्यार्थी नेताहरुको ज्ञापन

न्यूज ब्यूरो, जनकपुरधाम । शिक्षा क्षेत्रमा फड्को हान्दै गएको जनकपुरधाम क्षेत्रमा विद्यार्थीहरुको भाडा अझै लागू नभएको भन्दै विद्यार्थी नेताहरुले धनुषाका सिडिओलाई ध्यानाकर्षण गराएका छन् ।

शुक्रबार राराब स्वीयूका सभापति मनिष यादवको नेतृत्वमा गएको टोलीले धनुषाका प्रमुख जिल्ला अधिकारी रामु राज कडरियालाई ज्ञापन पत्र बुझाएको हो । विद्यार्थीहरु सम्मलित टोलीले जनकपुरधाम क्षेत्रमा चल्ने सार्वजनिक यातायातमा सरकारले लागू गरेको ४५ प्रतिशत भाडा छुट कार्यन्वयनमा ल्याउन माग गरेका हुन् ।

धनुषा, महोत्तरी, सिरहा, सर्लाही, सप्तरी लगायतका जिल्लाहरुको लागि जनकपुरधाम शिक्षाको लागि हब बन्दै गएको अवस्थामा समेत यहाँका विद्यार्थीहरुले पाउनुपर्ने हकाधिकार अझै नपाएकोप्रति दुःख व्यक्त गर्दै यथाशिघ्र लागू गर्न माग गरेका हुन् ।

सोही क्रममा जनकपुरधाम बस व्यावसायी संघका अध्यक्ष मनोज चौधरीलाई समेत भेटेर उनीहरुले बसमा ४५ प्रतिशत छुटको व्यवस्था लागू गर्न माग गरेका हुन् । सो सन्दर्भमा बस व्यावसायी संघका अध्यक्ष चौधरीले एक महिनाभित्र बसमा ४५ प्रतिशत छुटको व्यवस्था लागू गरिने बताए । उनले सार्वजनिक यातायातमा विद्यार्थीले पाउनुपर्ने सहुलियत लागू हुने प्रतिवद्धता जाहेर गरे ।

सडक सँजाल जोडिएपछि गाउँस्तरबाट सार्वजनिक बसमै चढेर जनकपुर पढन आउने विद्यार्थीले पाउनुपर्ने ४५ प्रतिशत भाडा छुट कार्यन्वय भएपछि झन सहुलियत हुने विश्वास विद्यार्थी नेताहरुको छ ।