पत्रकार यादवको १३ औँ पूण्यतिथिमा न्यूज ब्यूरोले सिरहामा गर्यो 'श्रद्धाञ्जली अर्पण'

न्यूज ब्यूरो, सिरहा । न्यूज ब्यूरोका कार्यकारी सम्पादक स्वर्गीय विनय कुमार यादवको १३ औँ पूण्यतिथिमा श्रद्धाञ्जली कार्यक्रम गरिएको छ । न्यूज ब्यूरोको आयोजनामा सिरहाको गोलबजारस्थित श्रद्धाञ्जली कार्यक्रम गरिएको हो ।

न्यूज ब्यूरोका सिरहा संवाददाता पत्रकार सबिन्द्र कुमार यादवको अगुवाईमा स्वर्गीय पत्रकार विनय कुमार यादवको श्रद्धाञ्जली कार्यक्रम गरिएको हो । गोलबजारको पूर्व पश्चिम राजमार्ग अन्तर्गत गोलचक्करस्थित विभिन्न दलका नेता, विभिन्न मिडियाका पत्रकार, सँचारकर्मी, सिकारु पत्रकारहरुको उपस्थितिमा श्रद्धाञ्जली गरिएको हो ।

सो क्रममा न्यूज ब्यूरोका सिरहा संवाददाता सबिन्द्र यादवले उनको मृत्यू शंकास्पद रहेकोमा अनुसन्धान गरी दोषीलाई कानुनी कठघारामा नल्याएसम्म असली श्रद्धाञ्जली नहुने बताए । उनले अहिले १३ औँ पूण्यतिथिमा श्रद्धाञ्जली गरिएपनि उनका हत्यारालाई सजाए पाए सो दिन असलमा श्रद्धाञ्जली हुने बताए ।

नेपाली काँग्रेस निकट तरुण दल सिरहाका अध्यक्ष अरबिन्द कुमार मण्डलले पत्रकार यादवको मृत्यू र विभिन्न सँचारमाध्यममा आएको समाचारको आधारमा उनको हत्या भएको हुन सक्ने प्रमाणहरु छरपष्ट देखिएको भन्दै प्रहरीले सुस्ता देखाएको बताए । उनले धनुषा प्रहरीले पत्रकार यादवको प्रकरणमा सुस्तता देखाउनु प्रहरीको नियतप्रति शंका गर्ने ठाउँ रहेको बताए । उनले घटनाको अनुसन्धान यथाशिघ्र गर्नुपर्ने माग गरे ।

अनुभवी पत्रकार अर्जुन थपलियाले पत्रकार यादवको लगनशिलता र उनको समाजिक देनको प्रशँसा गर्दै उनको घटनाको बारेमा सुक्ष्म तरिकाले अनुसन्धानको आवश्कयता रहेको औँल्याए । उनले धनुषा प्रहरीको गतिविधि र कार्य सम्पादनप्रति प्रश्न उठाउँदै राष्ट्रको चौथो अँगसँग भएको यस्तो घटनमा प्रहरीले आरोपितहरुलाई जोगाउन खोजेको महसुस भएको सुनाए । उनले धनुषा प्रहरीले यसलाई कडा रुपमा नलिए पत्रकारहरुले आफ्नो तरिका अपनाउने चेतावनी दिए ।

सोही क्रममा सिरहाका पत्रकार विनय यादवले पत्रकार यादवको घटनामा सुक्ष्म अनुसन्धान हुनुपर्ने माग राखे । उनले एक पत्रकारको हत्या भएको हुन सक्ने विभिन्न यथेष्ट प्रमाणहरु, आधारहरु प्रहरी समक्ष हुँदाहुँदै प्रहरीले जाहेरी दर्ता गर्न आनाकानी गरेको भन्दै प्रहरीप्रति शंका जाहेर गरे ।

न्यूज ब्यूरोको कार्यालय जनकपुरधामबाट समन्वय गरी सिरहा संवाददाता सविन यादवले सिरहामा १३ औँ पूण्यतिथिको अवसरमा श्रद्धाञ्जली कार्यक्रम गरेको हो ।