जनकनन्दिनी गाउँपालिका ८ दलिय सँघर्ष समितिले लगाए ताला, अध्यक्ष भन्छन- 'जबरदस्तीको सीमा छैन'

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकामा तालाबन्दी गरिएको छ । मँगलबार ८ राजनीतिक पार्टी सम्मलित सँघर्ष समितिले तालाबन्दी गरेको हो ।

विभिन्न माग राख्दै महिनौदेखि किस्ता किस्तामा आन्दोलन गर्दै आएका सँघर्ष समितिले अझै चित्त नबुझेको भन्दै तालाबन्दी गरेको हो । सँघर्ष समितिले माग गरेको विवरण, सूचना गाउँपालिकाले उपलब्ध गराएपनि मँगलबार बलपूर्वक तालाबन्दी गरेको बताईएको छ ।

सँघर्ष समितिले विभिन्न ५ बुँदे माग राखी आन्दोलन गर्दै आएकोमा गाउँपालिकाले २० दिनको समय दिएको थियो । जवाफ स्वरुप गाउँपालिकाको तर्फबाट गाउँपालिका अध्यक्ष दिपिनदेव यादवले लिखित जवाफ दिएका थिए । जवाफ अझै सन्तुष्ट नभएको भन्दै समितिले चित्त नबुझेको उल्लेख गर्दै पुनः आन्दोलन गरेको बताईएको छ ।

जनमतका नविन पण्डित, पूर्व वडाध्यक्ष धर्मेन्द्र गोईत, हरिशचन्द्र कामत, पूर्व गाउँपालिका उपाध्यक्ष भारती कार्की सहगल, गाउँपालिका अध्यक्षका प्रत्यासी एवम काँग्रेसका नेता सुदेश चौधरी, राप्रपाका कमलेश झा लगायतका नेताहरुले गाउँपालिका पुगेर तालाबन्दी गरेको हो । स्पष्ट जवाफ नआएको भन्दै तालाबन्दी गरेको बताईएको छ ।

यता, गाउँपालिका अध्यक्ष यादवले सँघर्ष समितिले माग गरेको सबै विवरण उपलब्ध गराएको बताएका छन् । लिखित रुपमै जवाफ मागेपछि लिखित रुपमै जवाफ दिएको बताए । उनले विभिन्न बुँदाहरुको जवाफ बुँदागत रुपमै दिएको थपे ।

सँघर्ष समितिले गत दुई आर्थिक बर्षको आयव्यय माग गर्दै चेक, भौचर नम्बरको विवरण समेत माग गरेको हो । सोही क्रममा किसानलाई समयमै मलखाद्य र बीउ बिजन उपलब्ध गराउनुपर्ने, दरबन्दी अनुसारको प्रमुख प्रशासकीय अधिकृत हुनुपर्ने, गाउँपालिका अध्यक्षले आफ्नै गाडीलाई भाडामा चढदै आएकोले कार्यालयको गाडी प्रयोग गर्नुपर्ने, अध्यक्ष उपाध्यक्ष र तत्कालिन अधिकृत अयोधी दासले बागबण्डाको आधारमा आफ्नो आफन्तलाई नियुक्ति गरेको भन्दै बदर गरी जनताको लागि सेवाको अवसर प्रदान गर्नुपर्ने माग राखिएको थियो ।

सो क्रममा दुई आर्थिक बर्षको आय व्यय लिखित रुपमै सबै कागजात दिएको, चेक नम्बर भौचरसहितको विवरण कार्यालयको गोपनियता रहेकोले दिन नमिल्ने स्पष्ट गरिएको, किसानलाई आवश्यक मलखाद्य र बीउ बिजन समयमै प्रयाप्त प्राप्त भएको सबुत प्रमाण दिएको, दरबन्दी अनुसारकै प्रमुख प्रशासकीय अधिकृत अहिले कामकाज गरिरहेको र आफन्त नियुक्तीको सन्दर्भमा पूर्णतः कानुनी रुपमा परीक्षाको माध्यमबाट प्रक्रियागत नियुक्ति गरिएको अध्यक्ष यादवले फर्काए ।

उनले आफन्त नियुक्तिको सन्दर्भमा पूर्ण कानुनी प्रक्रिया अनुसार भएको दाबी गर्दै यसबारे अख्तियारमा मुद्दा चलिरहँदा बदरको कुनै सबाल नै नउठेको बताए । गैर कानुनी तवरबाट गरिएको भए सबुत प्रमाण पेश भएको खण्डमा कानुनी प्रक्रिया मिलाएरै बदर गर्ने पनि बताए ।

सो सन्दर्भमा गाउँपालिकाका प्रमुख प्रशासकीय अधिकृत शैलेश यादवले सँघर्ष समितिले माग गरेको बमोजिमको कागजात, सूचना, विवरण उपलब्ध गराएको पुष्टि गरे । सबै जवाफ र विवरण लिखित रुपमै प्रदान गरिएको बताउँदै उनले के र कुन कुरामा चित्त नबुझेको उल्लेख गरिए सोही अनुसार चित्त बुझाउने उनले बताए ।

यता, गाउँपालिका अध्यक्ष यादवले भने जवाफ र विवरण दिएपनि बलपूर्वक तालाबन्दी गरी जनकनन्दिनी गाउँपालिकाको विकासमा बाधक बन्न खोजेको बताए । राजनीतिक रोटी सेक्नको लागि आम नागरिकको विकासलाई लथालिँग पार्न खोजेको आरोप लगाए । उनले भने, “जहाँ चित्त बुझेको छैन मौखिकमै बुझाउँछु भनेर छलफलको लागि समय पनि दिएकै थिए तर उहाँहरु आफैँ आउनुभएन । लिखित रुपमै जवाफ चाहियो भने प्रश्न र के कहाँ चित्त बुझेको छैन त्यति त भन्नु परो नी ? खाली चित्त नै बुझेन भनेर हुन्छ ? के चित्त बुझेन भनेर प्रष्ट पार्नुपरो नी ?”

सँघर्ष समितिलाई पटक -पटक छलफलको लागि बोलाउँदा नआएको बताउँदै सस्तो लोकप्रियताको लागि यस्तो हर्कत गरेको अध्यक्ष यादवले आरोप लगाए । उनले छलफलको माध्यमबाट वार्ताको माध्यमबाट समस्या समाधानको लागि अपिल गरे ।