अन्तिम दर्जाको उपप्रधानमन्त्री स्वीकार गर्दै उपेन्द्रले लिए सपथ

न्यूज ब्यूरो, काठमाडौँ । प्रधानमन्त्री प्रचण्डले मन्त्रिपरिषद् विस्तार गरेका छन् । उनले आइतबार जसपालाई समेटेर मन्त्रिपरिषद् विस्तार गरेका हुन् । जसअनुसार जसपाका अध्यक्ष उपेन्द्र यादव उपप्रधानसहित स्वास्थ्य तथा जनसङ्ख्या मन्त्री बनेका छन् ।

यसैगरी जसपाबाटै नबलकिशोर साह वन मन्त्री बनेका छन् । दुवै मन्त्रीलाई राष्ट्रपति रामचन्द्र पौडेलले आइतबार बिहान पद तथा गोपनीयताको शपथ दिलाएका छन् । शीतल निवासमा आयोजित शपथ समारोहमा उपराष्ट्रपति, प्रधानमन्त्री, सभामुख, प्रधानन्यायाधीशलगायत विशिष्ट व्यक्तित्वहरूको सहभागिता रहेको थियो ।

चार पटकभन्दा बढी उपप्रधानमन्त्री बनिसकेका जसपा अध्यक्ष उपेन्द्र यादव रवि लामिछानेभन्दा तलको अन्तिम दर्जामा बस्न तयार भएका छन् ।

स्रोतका अनुसार उनले रघुवीर महासेठभन्दा माथि अर्थात् प्रधानमन्त्रीपछिको दर्जा मागेका थिए । तर, दलको आकारअनुसार वरीयता निर्धारण गरिने भन्दै यादवलाई तेस्रो दर्जाको उपप्रधानमन्त्री बनाइएको हो ।

०६५ सालदेखि लगातार मन्त्री र उपप्रधानमन्त्री भइरहेका यादव रवि लामिछानेभन्दा तलको दर्जामा रहने भएका छन् । यसअघि नारायणकाजी रघुवीरभन्दा तलको वरियतामा गएको भनेर माओवादीमा आलोचना भइरहेको छ ।

त्यस्तै जसपाबाट मन्त्री बनेका नवलकिशोर साहको दर्राजा स्वपाका विराजभक्त श्रेष्ठको भन्दा तल अर्थात् सबैभन्दा तल रहने भएको छ ।