मधेशबाट काँग्रेसका आनन्द ढुँगानासहित राष्ट्रिय सभाका सदस्यहरुले लिए सपथ

न्यूज ब्यूरो, जनकपुरधाम । मधेश प्रदेशबाट नेपाली काँग्रेसका नेता आनन्द प्रसाद ढुँगानासहित निर्वाचित देशैभरिका राष्ट्रियसभा सदस्यहरुले सपथ लिएका छन् ।

राष्ट्रिय सभाका १९ जना नवनिर्वाचित सांसदहरूले आज (सोमबार) सपथ लिएका हुन् ।

संघीय संसद भवनको लहोत्से हलमा आयोजित कार्यक्रममा राष्ट्रिय सभाकी उपाध्यक्ष उर्मिला अर्यालले पद तथा गोपनीयताको शपथ खुवाएकी हुन् ।

आइतबार मात्रै राष्ट्रिय सभाका अध्यक्ष गणेशप्रसाद तिमिल्सिनासहित ६ वर्षे कार्यकाल सकिएका २० जना सांसदलाई बिदाइ गरिएको थियो भने नयाँलाई स्वागत गरिएको थियो ।

रिक्त २० जनाको पदमध्ये १९ जना गत माघ ११ गतेको निर्वाचनबाट निर्वाचित भएका हुन् । एक जना भने मन्त्रिपरिषदको सिफारिसमा राष्ट्रपतिबाट नियुक्त हुन बाँकी छन् ।

१९ सदस्यका लागि भएको निर्वाचनपछि राष्ट्रिय सभामा माओवादी केन्द्र पहिलो दल बनेको छ ।

मधेश प्रदेशबाट राष्ट्रियसभाको लागि निर्वाचित भएका आनन्द ढुँगानासहित रुकमिणी कोइराला, कृष्णप्रसाद सिटौला, पूजा चौधरी, विष्णुदेवी पुडासैनी, जितजङ्ग बस्नेत, मनरुपा शर्मा, पदमबहादुर परियार, किरणबाबु श्रेष्ठ, विष्णुकुमारी सापकोटा, झक्कुप्रसाद सुवेदी, सावित्री मल्ल, विष्णुबहादुर विश्वकर्मा, कृष्णबहादुर रोकाय, रेनु चन्द, नारायणदत्ता भट्ट र बलदेव बोहराले सपथ लिएका हुन् ।

सोही क्रममा मधेश प्रदेशबाट राष्ट्रिय सभाका लागि सपथ लिएका आनन्द प्रसाद ढुँगानालाई धनुषाधाम नगरपालिकाका मेयर बालेश्वर मण्डलले बधाई पत्र पठाएका छन् । उनको नीजि सचिवालयले ढुँगानाले पद तथा गोपिनयताको सपथ लिएपछि शुभ कार्यकालको शुभकामनासहित बधाई दिएको हो ।