कुनै खास समुदायलाई होच्याएर मुलुकको विकास सम्भव छैनः अध्यक्ष यादव

न्यूज ब्यूरो, जनकपुरधाम । जनता समाजवादी पार्टी नेपालका अध्यक्ष उपेन्द्र यादवले कुनै खास सामुदायलाई होच्याएर मुलुकको विकास सम्भव नरहेको दाबी गरेका छन् ।

जसपाको भातृ संगठन समाजवादी मुस्लिम संघको प्रदेशस्तरीय भेलालाई मंगलवार जनकपुरधाममा सम्बोधन गर्दै अध्यक्ष यादवले नेपाल बहुभाषी, बहुजाती र बहुधार्मिक भएकोले कुनै खास सामुदायलाई विभेद गरेर मुलुकको विकास नहुने बताए ।

मुलुकको निर्माणदेखि हरेक राजनीतिक परिवर्तनमा नेपाली मुस्लिमको उल्लेखनीय योगदान रहे पनि आर्थिक, समाजिक, तथा राजनीतिक जनचेतनामा निकै पछाडि परेको उनले बताए ।

उनले भने, ‘यो मुलुक बहुभाषिक, बहुजातिय र बहुधार्मिकको देश हो, कुनै सामुदायलाई होच्चाएर, विभेद गरेर, बहिष्करणका पारेर न मुलुकको शान्ति र स्थिरता आउँदैन न त मुलुकको विकास नै सम्भव छ । समाजिक भाईचारा, धार्मिक सद्भाव र मेलमिलापले नै देश आर्थिक समृद्धिको बाटोमा अगाडि बढ्छ ।’ पूर्व उपप्रधानमन्त्रीसमेत रहेका अध्यक्ष यादवले भने, ‘प्रकृतिले नेपाललाई धेरै थोक दिएको छ, हामी जलश्रोतमा निकै धनी छौँ, यहाँ पर्यटनको ठुलो सम्भावना छ, तर शासन सत्तामा बसेकाहरुले दुई तिहाई जनताको साथ विभेद र उपेक्षा गरेको कारण मुलुकमा आर्थिक समृद्धि आउन सकेनन् ।