सरुवा भएको डेढ महिना नबित्दै हँसपुरको प्रशासकीय अधिकृतमा पुनः हाजिर भए ठाकुर

न्यूज ब्यूरो, जनकपुरधाम । धनुषाको हँसपुर नगरपालिकामा प्रमुख प्रशासकीय अधिकृतको रुपमा पुनः सुबोध कुमार ठाकुर हाजिर भएका छन् ।

गत पुस २२ गते मात्र सरुवा भएका ठाकुरलाई पुनः हँसपुर नगरपालिकामै हाजिर भएको हो । सरुवा भएको डेढ महिनामा नयाँ प्रमुख प्रशासकीय अधिकृत पाएको हँसपुरले छोटो अवधीमा पुनः सुबोध कुमार ठाुकरलाई भित्र्याएको हो ।

संघीय मामिला तथा समान्य प्रशासन मन्त्रालयले ठाकुरलाई सरुवा भएको ठाउँबाट पुनः सरुवा गरी हँसपुरमै पठाएको हो । नगर प्रमुख प्रदीप कुमार यादवले ठाकुरलाई पुनः सोही नगरपालिकामा ल्याउनको लागि प्रयासरत रहेका थिए ।

ठाकुरको कार्य सम्पादन, कर्मचारी व्यवस्थापनसहित राजस्व सँकलनको लागि महत्वपूर्ण भूमिका निर्वाह गरेको भन्दै पुनः ठाकुरलाई माग गरेको बुझिएको छ । यसअघि मन्त्रालयले नै पठाएको उमेश महतोलाई भने अन्य ठाउँमा सरुवा भएको हो ।

नगरपालिकाको विकास निर्माणलाई तिव्रता दिनको लागि प्रमुख प्रशासकीय अधिकृतको रुपमा ठाकुरलाई सानै अवधीमा दोस्रो पटक स्थापित गराईएको हो । उनले मँगलबार नै पुनः कार्यभार सम्हालेका छन् । उनलाई नगर प्रमुख यादवसहित, उपमेयर, वडाध्यक्षहरु, कर्मचारीहरुले फूलमाला लगाएर दोस्रो पटक स्वागत गरेको हो ।